U litoŭskich Miednikach (Miadzininkaj) na biełaruska-litoŭskaj miažy adkryli paśla rekanstrukcyi samy sapraŭdny siaredniaviečny zamak.Ad zamku da Biełarusi — tolki 2 kiłamietry, i heta adzinaje, što adździalaje jaho ad biełaruskaj historyi. Ale nie turystaŭ. Generation.by trapiŭ u zamak adnym ź pieršych.
Zamiest bramy — prosta prałom u ścianie i biletnaja kasa na ŭvachodzie. Studentam — 3 lity (9 tys. rubloŭ), astatnim — 6.Heta płata za mahčymaść ahledzieć tolki što adkrytuju dla publiki siaredniaviečnuju ćviardyniu: abharodžanyja adnoŭlenymi kala dvuch mietraŭ šyrynioj kamiennymi ścienami, ukrytyja novieńkaj čyrvonaj čarapicaj, dva hiektary hazonu i piacipaviarchovuju viežu sa ściaham z pahoniaj na dachu.
Vyjava staražytnaha zamku na kvitku padkazvaje: ty trapiŭ u siaredzinu niečaha koliś vielmi značnaha i surjoznaha. Hałoŭnaje nie razhubicca, i adrazu nakiravacca ŭ bok viežy, dzie turystaŭ prymajuć uśmiešlivyja muziejščycy, što čas ad času vymušanyja adciahvacca na toje, kab prahnać miascovych padletkaŭ da zamkavaj ściany, jakuju tyja ź niejkaj nietłumačalnaj metaj imknucca zrujnavać draŭlanymi pałkami.
Siaredniaviečča za $3 młn
My i nie zdahadvalisia, ale ŭ dvuch kiłamietrach ad pamiežnaha propusku Kamienny Łoh na biełaruska-litoŭskaj miažy šmat hadoŭ chavaŭsia sapraŭdny skarb historyi Vialikaha kniastva Litoŭskaha: siaredniaviečny zamak Miedniki. Zamak byŭ zrujnavany jašče ŭ tyja časy, kali prystojnyja ludzi ŭ dalokija vandroŭki bieź miača nie vypraŭlalisia, a pa kniastvu čas ad času pranosilisia vichory roznych zavajoŭnikaŭ.
Paśla Druhoj suśvietnaj da Miednikaŭ dabralisia archieołahi, jakija, trochu pakapaŭšysia ŭ jahonaj hlebie, pakinuli ruiny dažyvać da časoŭ niezaležnaści Litvy. I tolki dva hady tamu ŭ zamku pačalisia pracy pa adnaŭleńni siaredniaviečnaj cikavostki. Biez hrošaj Jeŭrapiejskaha sajuzu nie abyšłosia.
Ułasna, tolki na brusielskija $3 młn. i byŭ adnoŭleny zamak — litoŭski ŭrad nie znajšoŭ na rekanstrukcyju ni centa.
Zamak u Miednikach vielmi nahadvaje anałahičnaje zbudavańnie ŭ Krevie. Abodva zamki byli ŭźviedzienyja ŭ prykładna adnolkavy čas u sprobie Alhierda ci Hiedymina ŭmacavać Vialikaje kniastva ad niebiaśpieki napadaŭ kryžakoŭ. Vierahodna, adnymi i tymi ž budaŭnikami. Kažuć, što budavali zamki fantastyčnaha rostu asiłki. I kali ŭ kahości ź ich nie stvała patrebnaha instrumientu, to jany vielmi prosta dzialilisia imi: pierakidali pa pavietry hihanckija małatki i rubanki ad adnoj budoŭli da inšaj. Niebłahi pramiežak, miž inšym: ad Kreva da Miednikaŭ kala 45 kiłamietraŭ.
Toj taksama ciapier rekanstrujujuć. Hetu biełaruskuju budoŭlu, što ŭžo paśpieli adnieści da stylu «ahrareniesansu», nazyvajuć žachlivaj z-za chibaŭ takich maštabaŭ, jakich, mabyć, nie viedała jašče biełaruskaja rekanstrukcyja. Zrešty, i litoŭskaja viersija siaredniaviečnaha zamku nie nadta adpaviadaje kanonam tych časoŭ.Inšy biełaruski zamak, što taksama «ŭražvaje svajoj surovaj pryhažościu» — Lidski.
Akazvajecca, i «tam» nie ŭsio dobra z zachavańniem spadčyny! Chacia peŭny ŭzrovień prystojnaści budaŭnikam usio ž atrymałasia zachavać: bietonnyja prystupki starana schavanyja pad surjoznym uzroŭniem tynkoŭki, a ŭmacavanyja ŭ ścieny zamkavaj viežy razietki i lichtary vyhladajuć davoli naturalna. Asabliva kali ŭličyć skład muziejnaj ekspazicyi, što zaniała čatyry pieršych pavierchi viežy.
Kali pieršy pavierch davoli naturalna adviedzieny dla ekspazicyi siaredniaviečnych harmataŭ i hlinianaj kieramiki, da jakoj dałučanaja čamuści vystava śladoŭ žyŭnaści na cahlinach, to vyšejšyja pavierchi zaniatyja, padajecca, tym, što atrymałasia znajści pa ŭsioj Litvie.Tut i zbroja ŭsich siaredniaviečnych časoŭ i novačaśsia, i kryštal, i navat pudziły žyviołaŭ z kalekcyi znatnaha litoŭskaha palaŭničaha i pieršaha paśla viartańnia niezaležnaści prezidenta krainy Brazaŭskasa. Adpaviednyja instrukcyi da ekspanataŭ starana tłumačać, što u časy, da jakich adnosicca zamak, palavańnie było naturalnaj častkaju žyćcia šlachty. Ale ŭsio roŭna zastajecca adčuvańnie, što ekspazicyju viežy litoŭskija muziejnyja supracoŭniki zapaŭniali z apošnich siłaŭ: nitka da nitki, jak toj kazaŭ.
Viadoma, što kali ŭ kancy 14 st. kryžaki dabralisia da Miednikaŭ, u čas asady jany zładzili pad jahonymi ścienami pakazalny rycarski turnir. Karcina, na jakoj možna pabačyć zamak tych časoŭ, u kampanii inšych vyjavaŭ litoŭskich i biełaruskich zamkaŭ visić na pieršym paviersie viežy.Z apošniaha pavierchu možna trapić na dach, dzie jość šaniec trochu pafantaziravać na temy tahačasnych bitvaŭ.
