27 vieraśnia šerah ukrainskich haziet i časopisaŭ vyjduć z pustymi pieršymi pałosami ŭ znak pratestu suprać zakona ab paklopie, paviedamlaje Korriespondient.net.
Uśled za časopisam Karespandent hetuju ideju padtrymali vydańni KyivPost, Visokij Zamok, Lvivśka hazieta, Lvivśka pošta, Ratuša, Kołovorot. Zaŭtra ŭsie jany vyjduć ź biełymi pieršymi pałosami.
Ranicaj 25 vieraśnia startavała Usieŭkrainskaja akcyja pratestu suprać pryniaćcia zakona ab paklopie «Abarani svajo prava viedać. Skažy nie zakonu ab paklopie».
Akcyju, u pryvatnaści, padtrymali Ukrainskaja pravda, Korriespondient.net, hazieta i sajt Komsomolskaja pravda v Ukrainie, Siehodnia.ua, TVi, LB.ua, Football.ua, iSport.ua, LIHA.net, Tielekritika, Newsru.ua, Dieło.ua, InviestHazieta, KyivPost, Dień, RBK-Ukraina, Ostrov, ahienctvy Ukrajinśki novini i Intierfaks-Ukraina dy inšyja. Na hałoŭnych staronkach udzielnikaŭ akcyi źjaviŭsia baner z patrabavańniem nie dapuścić pryniaćcia zakona ab paklopie.
Akramia taho, časopis Karespandent papiaredziŭ, što ŭpieršyniu ŭ svajoj historyi vyjdzie ź biełaj vokładkaj u znak pratestu suprać zakonaprajekta, jaki ŭvodzić pakarańnie za paklop u vyhladzie pazbaŭleńnia voli terminam da piaci hadoŭ.
Učora ŭviečary, 25 vieraśnia, narodny deputat Vital Žuraŭski zajaviŭ, što adklikaje rezanansny zakonaprajekt ab paklopie. Akramia taho, prezident Ukrainy Viktar Janukovič rastłumačyŭ, što deputaty «nie zrazumieli sensu prapanavanaha zakonaprajekta».
