Źniavolenyja pavinšavali Statkieviča z Dniom biełaruskaj vajskovaj słavy
Źniavolenyja turmy, dzie trymajuć Mikałaja Statkieviča, na Dzień biełaruskaj vajskovaj słavy kryčali jamu «Žyvie Biełaruś!»
Eks-kandydatu ŭ prezidenty Mikałaju Statkieviču, jaki ŭtrymlivajecca ŭ Mahiloŭskaj turmie, dakładna viadoma, što 8 vieraśnia kala ŭvachodu ŭ turmu jaho adnadumcy zładzili fiejervierk, prymierkavany da Dnia biełaruskaj vajskovaj słavy. Žonka palityka Maryna Adamovič padzialiłasia źviestkami pra muža:
«Kala ścien turmy byŭ zładžany ŭ honar Mikałaja fiejervierk, salut. Jon zrazumieŭ, u čyj honar heta było. I ŭ turmie zrazumieli. Źniavolenyja, vidać, adsočvajuć situacyju, bo znoŭ kryčali dla Mikałaja „Žyvie Biełaruś!“ Heta mnie dakładna viadoma».
Pra samoha Mikałaja Statkieviča Maryna Adamovič paviedamiła, što jon pa-raniejšamu ŭ kamiery ź jašče adnym źniavolenym, na zdaroŭje nie skardzicca, zachoŭvaje dobry nastroj.
Były kandydat u prezidenty Mikałaj Statkievič asudžany na 6 hadoŭ źniavoleńnia za padziei 19 śniežnia 2010 hoda. Palitviaźnia trymajuć u krytaj turmie jak «złosnaha parušalnika» turemnaha režymu.
