Sud nad eks-načalnikam sakrataryjata savieta respubliki zrabili zakrytym. Chadajnictva pra pieranos pracesu ŭ zakryty razhlad zajaviŭ prakuror.
Maŭlaŭ, u spravie prysutničaje intymnaja infarmacyja, jakaja tyčycca abvinavačanaha.
Advakat i sam Biadrycki nastojvali, kab praces išoŭ adkryta. Ale sudździa Taćciana Tupik padtrymała prakurora.
Hleb Biadrycki byŭ zatrymany 19 kastryčnika 2011-ha. Jon abvinavačvajecca pa dvuch artykułach Kryminalnaha kodeksa:
čč.2–4 art.210 — «Kradziež šlacham złoŭžyvańnia słužbovymi paŭnamoctvami» i č.3 art.424 — «Złoŭžyvańnie ŭładaj albo słužbovymi paŭnamoctvami».
Hleb Biadrycki naradziŭsia ŭ 1974 hodzie ŭ Navapołacku. U 1996 hodzie skončyŭ Biełaruskuju dziaržaŭnuju politechničnuju akademiju pa śpiecyjalnaści «pramysłovaje i hramadzianskaje budaŭnictva», u 2000-m — Akademiju kiravańnia pry prezidencie pa śpiecyjalnaści «suśvietnaja ekanomika i mižnarodnyja ekanamičnyja adnosiny». Jahony karjerny šlach cikavy: pracavaŭ u Ministerstvie architektury i budaŭnictva, pasolstvie Biełarusi ŭ Hiermanii, aparacie Savieta ministraŭ. Pasadu načalnika sakrataryjata savieta respubliki zaniaŭ u vieraśni 2003 hoda. Heta značyć, litaralna praz dva miesiacy paśla taho, jak u apazicyju pierajšoŭ tahačasny kiraŭnik pałaty akademik Alaksandr Vajtovič. Musić, tady ŭ peŭnych strukturach zrazumieli, što prahapili Vajtoviča i što kantrol nad pałataj treba «ŭzmacniać».