Siamji z troch čałaviek s hazavaj plitoj ustanoviać limit elektryčnaści 100 kVt·h za miesiac 21

U DVA «Biełenierha» raspracavany dyfierencyravanyja taryfy na apłatu elektraenierhii, zychodziačy z kolkaści prapisanych u kvatery čałaviek i siezona. Pra heta paviedamiŭ siońnia na pres-kanfierencyi ŭ Minsku načalnik upraŭleńnia zbytu hetaj arhanizacyi Siarhiej Šebieka.

Pavodle jaho słoŭ, u kvaterach z hazavymi plitami ŭ mižaciaplalny siezon (z 1 krasavika pa 30 vieraśnia) płanujecca ŭstalavać sacyjalny taryf 70 kVt·h na adnaho čałavieka i pa 15 kVt·h na kožnaha dadatkova zarehistravanaha čałavieka.

Takim čynam, dla siamji z troch čałaviek budzie dziejničać narmatyŭ 100 kVt·h.

U aciaplalny siezon (z 1 kastryčnika pa 30 sakavika) taryf na adnaho čałavieka składzie 80 kVt·h, na kožnaha inšaha člena siamji — plus 15 kVt·u.

U vypadku raschodu elektraenierhii zvyš hetaj normy žycharam pryjdziecca płacić 595 rubloŭ za kVt·h, što ŭ dva razy bolš, čym siońnia.

U kvaterach z elektryčnymi plitami prapanujecca nastupnaja schiema: u mižaciaplalny siezon 120 kVt·h na adnaho čałavieka i 20 kVt·h na kožnaha dadatkova zarehistravanaha. U zimovy siezon, adpaviedna, 135 kVt·h i 20 kVt·h.

Pa słovach Siarhieja Šebieki, kančatkovaje rašeńnie pa hetym pytańni jašče nie pryniata.

Pamiery sacyjalnych taryfaŭ buduć vyniesieny na hramadskaje abmierkavańnie (telefony «haračych linij» paviedamiać dadatkova). Mierkavańni hramadzian buduć vyvučać da 1 listapada.

Pradstaŭniki «Biełenierha» taksama ŭdakładnili, u hetym hodzie novyja taryfy dakładna uviedzieny nie buduć.

Śpiecyjalisty ŭdakładnili: kali ŭ kvatery nichto nie prapisany, płata za elektryčnaść budzie spahaniacca, zychodziačy z taryfu 595 rubloŭ za kVt·h.

Dadzieny košt u «Biełenierha» nazyvajuć ekanamična abhruntavanym i pryviazanym da ŭzroŭniu zarobkaŭ nasielnictva. Razam z tym navat pry takim taryfie enierhazabieśpiačalnyja arhanizacyi buduć nieści straty, zapeŭniła žurnalistaŭ v. a. namieśnika hiendyrektara «Biełenierha» Nina Hrečycha. Pavodle jaje słoŭ, siońnia nasielnictva apłačvaje 3 centy za kožny kiłavat, tady jak dla stopracentnaha pakryćcia vydatkaŭ treba płacić u try razy bolš.

Vychad na poŭnuju apłatu koštu elektraenierhii nasielnictvam u Biełarusi zapłanavany na 2015 hod.

Pa słovach śpiecyjalistaŭ, vyznačany niekatoryja katehoryi hramadzian, jakich nie zakranuć dyfierencyravanyja taryfy. Da ich adniesieny šmatdzietnyja siemji. Razam z tym u «Biełenerha» nie ličać, što novyja taryfy mocna ŭdarać pa kišeniach biełarusaŭ. Na pres-kanfierencyi prahučała takoje mierkavańnie:

«Ludzi płaciać za razmovy pa mabilnym telefonie pa 50 tysiač u miesiac i nie skardziacca, što hrošaj nie chapaje. U toj ža čas za elektraenierhiju płaciać usiaho 30–40 tysiač rubloŭ — heta małyja hrošy».

realt.onliner.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH