U redakcyju źviarnuŭsia čytač Mikoła B. ź Śvietłahorskaha rajona. Jon raskazvaje pra situacyju ź jakoj sutyknulisia žychary susiedniaha Akciabrskaha rajona pry zdačy jabłykaŭ narychtoŭščyku.
«Akazvajecca, kab zdać “zakonna” hetyja jabłyki, treba napisać voś takuju papieru, atrymać daviedku i tady… Takuju praceduru tutejšy lud abazvaŭ “durdomam”, i nie biez padstaŭ. Ź jakoj epochi hetaja papierčyna? Miarkuju, što heta čysta fieadalny ździek z nas, biełarusaŭ.Pra što možna kazać, kali na pradukcyju ŭłasnaha dvara treba daviedka», — piša čytač.
Jon dasłaŭ u redakcyju ŭzor zajavy na atrymańnie daviedki. U joj treba paznačyć adras pražyvańnia, pašpartnyja dadzienyja, pamier ziamielnaha ŭčastka i vyrablenuju pradukcyju.
Pa kamientary my źviarnulisia ŭ Lubanski sielski vykanaŭčy kamitet. Akurat jon paznačany na błanku zajavy. Tam patłumačyli, što padobnyja daviedki vydajucca nasielnictvu daloka nie pieršy hod. Nieabchodnyja takija dakumienty dla ŭliku.
Kali čałaviek pradaje na rynku abo zdaje narychtoŭščyku sadavinu, to ŭ daviedcy treba paznačyć kolkaść pładovych drevaŭ i kustoŭ na padvorku. Daviedka vydajecca adzin raz na hod (siezon), afarmleńnie jaje biaspłatnaje.
Apad za 500 rubloŭ
Dziaržaŭnyja narychtoŭščyki štohod ustaloŭvajuć zakupačnyja ceny dla nasielnictva. U kožnym rehijonie moža być svaja cana. Tak, naprykład, sioleta ŭ Mahiloŭski abłspažyŭsajuz prymaje jabłyki pa 500 rub/kh. U toj ža čas, u minułym hodzie ŭ vieraśni hrodzienskija narychtoŭščyki davali za kiłahram jabłykaŭ pa 1000 rub.
Tańniej u babul
Bieły naliŭ u stychijnych handlaroŭ kala kramaŭ kaštuje ad 5 tysiač rubloŭ. Heta samy tanny varyjant. U minskich kramach pradajuć impartnyja jabłyki, ceny siahajuć da 20000 rubloŭ. Na haradskich rynkach sustrakajucca polskija i hałandskija jabłyki pa 12-15 tysiač.
