Premija ŭ pamiać pra byłoha prezidenta niamieckaha PEN-centra Hiermana Kiestena ŭručajecca napiaredadni mižnarodnaha Dnia źniavolenych piśmieńnikaŭ, jaki adznačajecca 15 listapada. Premiju atrymlivajuć litaratary i žurnalisty za vydatnyja zasłuhi ŭ abaronie pravoŭ čałavieka i tyja ź ich, chto traplaŭ pad palityčnyja represii.
Sioleta ŭhanaravańnie łaŭreataŭ zapłanavanaje na 11 listapada, adnak asabista atrymać premiju Iryna Chalip naŭrad ci zmoža. 16 maja 2011 hoda ŭ ramkach kryminalnaj spravy pra «masavyja biesparadki» ŭ Minsku 19 śniežnia 2010 hoda jana była asudžanaja da 2 hadoŭ pazbaŭleńnia voli z adterminoŭkaj vykanańnia pakarańnia na 2 hady.
U adpaviednaści z prysudam, joj zabaronieny vyjezd za miežy krainy. Adnak Iryna Chalip nie vyklučaje, što na cyrymonii moža albo prysutničać jaje pradstaŭnik, albo jana padrychtuje admysłovy videazvarot.
Łaŭreatami premii Hiermana Kiestena ŭ roznyja hady byli niamieckija prazaiki Anhielika Miechtel i Hiunter Hras, anhlijski dramaturh Harald Pinter, rasiejskaja žurnalistka Hanna Palitkoŭskaja dy inšyja.
