Akcyi ŭ padtrymku Alesia Bialackaha i inšych palitviaźniaŭ u Biełarusi prajšli siońnia ŭ šerahu samych roznych haradoŭ śvietu. Tak, svaju salidarnaść vykazvali ŭ Lajpcyhu i Ciurychu, Kijevie i Murmansku, Jerevanie i Maskvie. Hetyja akcyi buduć praciahvacca.
4 žniŭnia, u hadavinu zatrymańnia Alesia Bialackaha, adznačacca Mižnarodny dzień salidarnaści z hramadzianskaj supolnaściu Biełarusi. Mižnarodny dzień salidarnaści z hramadzianskaj supolnaściu Biełarusi abvieščany šyrokaj kaalicyjaj niaŭradavych arhanizacyjaŭ z roznych krain, jakija ŭvachodziać u «Kamitet mižnarodnaha kantrolu za sytuacyjaj z pravami čałavieka ŭ Biełarusi». Padtrymku Bialackamu i inšym palitviaźniam vykazvajuć zamiežnyja pravaabaroncy i arhanizacyi.
4 žniŭnia spaŭniajecca hod z momantu zatrymańnia biełaruskaha pravaabaroncy Alesia Bialackaha, vice-prezydenta FIDH.
Kiraŭnik začynienaha ŭładami pravaabarončaha centru «Viasna» Aleś Bialacki asudžany na 4,5 hoda turmy ŭ listapadzie letaś. Jaho pryznali vinavatym u niaspłacie padatkaŭ. Pravaabaronca svajoj viny nie pryznaŭ i zajaviŭ, što ŭsie hrošy, atrymanyja na jahonyja rachunki, išli na pravaabarončuju dziejnaść.
Padstavaj dla kryminalnaha pieraśledu Bialackaha stała infarmacyja pra bankaŭskija rachunki, jakuju pieradali aficyjnamu Miensku Litva i Polšča.
Krainy Eŭraźviazu, ZŠA i mižnarodnyja pravaabarončyja arhanizacyi ličać Bialackaha palitviaźniem, a prysud jamu — palityčna matyvavanym. Jany patrabujuć ad uładaŭ Biełarusi vyzvalić pravaabaroncu.
