U NN źviarnuŭsia žychar Vałožynščyny. «U rajonnaj haziecie ja pabačyŭ uviedamleńnie pra mahčymaść hramadskich słuchańniaŭ z nahody budaŭnictva śvinakompleksa ŭ rajonie. Infarmacyja pra jaho ŭźviadzieńnie vyklikała šyroki riezanans i nieabyjakavaja mnohim žycharam Vałožynščyny. Ale nie ŭsie vypisvajuć «rajonku» i mohuć nie viedać pra mahčymaść arhanizavać słuchańni. Prašu Vas źmiaścić na sajcie NN infarmacyju pra hetyja abmierkavańni!»
Nahadajem, viasnoj hetaha hoda ŭ Vałožynskim rajonie Minskaj vobłaści STAA «Danprad» (ułasnaść Juryja Čyža), pačało budavać śvinakompleks ahulnaj płoščaj 2,5 tys. ha na 110 tys. hałoŭ.
Budoŭla zakranaje vioski Daŭhuleŭščyna (z chutarami), Kaniušaŭščyna (radzima eks-premjera Viačasłava Kiebiča), Makryčaŭščyna, Łajkoŭščyna, Suhvazdy, Puhačy (radzima paeta Viktara Šnipa), Łasokina, Ciabuty. Darečy, u hetych miaścinach maje chutar i lidar hurtu «Stary Olsa» Źmicier Sasnoŭski. Za 5 km ad budaŭnictva pačynajecca znakamitaja Nalibockaja pušča.
Śvinakompleks płanujecca ŭzvodzić pa dackaj technałohii, jakaja praduhledžvaje sanitarnuju zonu ŭsiaho 1 km, niahledziačy na pamiery kompleksu. Mnohija chaty ŭ vioskach u hetuju zonu traplajuć.
My źviarnulisia da načalnicy adździeła architektury i budaŭnictva Vałožynskaha rajona Taćciany Čuprys.
Jana patłumačyła nam, što infarmacyja pra mahčymaść hramadskich słuchańniaŭ jość na sajcie rajvykankama.
Adnak kab słuchańni adbylisia, treba da 14 žniŭnia dasłać u rajvykankam zajavu pra nieabchodnaść ich praviadzieńnie. Pakul jašče nichto z žycharoŭ nie źviartaŭsia z takoj prośbaj.
Takim čynam, kali kamu nieabyjakavaja prablema budaŭnictva śvinakompleksa ŭ Vałožynskim rajonie, da 14 žniŭnia treba dasłać u administracyju rajona zajavu advolnaj formy kštałtu «Prašu pravieści hramadskija słuchańni z nahody budaŭnictva śvinakompleksa».
Zajavu dasyłać na adras: 222357, h.Vałožyn, pł.Svabody, 2 (Vałožynski rajonny vykanaŭčy kamitet)
Pa słovach Taćciany Čuprys, na słuchańniach buduć prysutničać pradstaŭniki zakazčyka, prajekciroŭščyka i TAA «Navukova-vytvorčaja firma «Ekałohija», jakoje dało stanoŭčaje ekałahičnaje zaklučeńnie na budaŭnictva. Z tekstam zaklučeńnia možna aznajomicca na sajcie rajvykankama.
U pryvatnaści, u im adznačana:
«Niehatyŭnaje ŭździejańnie prajektavanaj śvinafiermy STAA «Danprod» na 100 000 hałoŭ u hod na atmaśfiernaje pavietra, paviarchovyja i padziemnyja vody, nietry, hleby, žyviolny i raślinny śviet, a taksama na čałovieka aceńvajecca jak prymalnaje….Uvod vytvorčaści ŭ ekspłuatacyju nie pryviadzie da parušeńnia pryrodna-antrapahiennaj raŭnavahi».
My zapytali ŭ spn.Čuprys, ci mohuć hramadskija słuchańni paŭpłyvać na pieranos śvinakompleksa ŭ inšaje miesca.
«Tam nie staić pytańnie ab pieranosie budoŭli. Pytańnie staić pra acenku ŭździejańnia i nastupstvaŭ. Na siońnia technałohii dazvalajuć pravieści vielmi jakasnyja pryrodaachoŭnyja mierapryjemstvy. Vybar učastka nie abmiarkoŭvajecca, abmiarkoŭvajecca mienavita raździeł achovy navakolnaha asiarodździa».
Atrymlivajecca, paŭpłyvać na budaŭnictva śvinakompleksa ŭ Vałožynskim rajonie niemahčyma. A na słuchańniach žychary adno zmohuć vykazać svaje rekamiendacyi i kryŭdy.
