Jość pieršy biełaruski miedal na Alimpijadzie! 16

Maryna Škiermankova ŭziała bronzavy miedal u spabornictvach pa ciažkaj atletycy ŭ vazie da 69 kh.

«Nu… z Boham…» — taki status staić u Maryny na jaje staroncy «Ukantakcie».

Jana, darečy, zachodziła na jaje siońnia ŭdzień — niezadoŭha pierad vychadam na pamost.

Maryna ŭ svaje 22 hady — adna z najmacniejšych biełaruskich štanhistak i aŭtarka dvuch nacyjanalnych rekordaŭ.

Jana naradziłasia 9 krasavika 1990 hoda ŭ Hłybokim. Tam pačynała vučobu, pakul nie pajechała ŭ vučelniu alimpijskaha reziervu.

Škiermankova — dvuchrazovaja čempijonka Jeŭropy siarod junijoraŭ (2009, 2010), srebny pryzior maładziovaha čempijanata Jeŭropy-2009, bronzavy pryzior maładziovaha čempijanata Jeŭropy-2011.

U hetaj vahavaj katehoryi Biełaruś, aproč Škiermankovaj, prezientavała i Dzina Sazanaviec. U pieršym praktykavańni — ryŭku — biełaruski pa čarzie ŭziali vahu 108 i 113 kiłahramaŭ. Zatym Dzina zdoleła zafiksavać 115 kiłahramaŭ, a Maryna zrabiła niaŭdałuju sprobu padniać 117. Takim čynam Sazanaviec mieła 2-i vynik. Škiermankova paśla ryŭka była na 5-m miescy.

U šturšku Dzina Sazanoviec 136 kh ź pieršaj sproby nie ŭziała, ale ŭziała z druhoj, i ŭ trecim padychodzie ŭziała 141 — 256 kiłahramaŭ u ahulnaj sumie.

Stolki ž pakazała i Maryna Škiermankova (135, 140 i 143), ale z-za taho što jana lahčejšaja za Dzinu, jaje vynik staŭ trecim.

Sazanaviec — na 4-m miescy. Rumynka Raksana Danieła Čočas, jakaja ŭ sumie ŭźniała stolki ž, ale važyć mieniej za biełarusak, zavajavała srebra. A čaćvierty załaty miedal dla svoj ​​zbornaj vyjhrała pradstaŭnica KNDR Rym Džon Sim.