Mižnarodnaje rejtynhavaje ahienctva Moody's kanstatuje zachavańnie vysokich ryzykaŭ u finansavaj śfiery Biełarusi. Pra heta havorycca ŭ paviedamleńni, raźmieščanym na aficyjnym sajcie ahienctva ŭ suviazi z apublikavańniem štohadovaj kredytnaj spravazdačy pa Biełarusi.
Pavodle acenki ekśpiertaŭ Moody's, rejtynh dziaržablihacyj na ŭzroŭni B3 i niehatyŭny prahnoz pa hetym rejtynhu adlustroŭvajuć «umierany ekanamičny patencyjał krainy, vielmi nizki instytucyjny patencyjał i nizki resurs dziaržaŭnych finansaŭ, jakija pavialičvajuć adčuvalnaść krainy da ryzykaŭ».
Mienavita vysokaja ŭsprymalnaść Biełarusi da ryzykaŭ i stała klučavym faktaram u vyrašeńni panizić rejtynhi pazykovych abaviazacielstvaŭ urada z B1 da B2 u sakaviku 2011 hoda, a zatym — da B3 u lipieni 2011 hoda, a taksama ŭstanavić niehatyŭny prahnoz, tłumačyć Moody's.
Ekśpierty ahienctva ličać, što aficyjnyja valutnyja reziervy i štohadovyja valutnyja pastupleńni ŭ Biełaruś zastajucca nizkimi ŭ adnosinach da ŭzroŭniu źniešniaha doŭhu i abaviazacielstvami pa jaho pahašeńni.
«Uzrovień abaviazacielstvaŭ pa pahašeńni doŭhu źjaŭlajecca ŭraźlivym da vahańniaŭ dastupnaści mižnarodnaha finansavańnia, — havorycca ŭ relizie. — U hetym płanie Biełaruś hałoŭnym čynam zaležyć ad Rasii i finansavych instytutaŭ, što padtrymlivajucca Rasijaj. Pakazčyk źniešniaj uraźlivaści krainy (karotkaterminovy źniešni doŭh, abaviazacielstvy pa doŭhaterminovym źniešnim doŭhu, suma depazitaŭ nierezidentaŭ na praciahu hoda, padzielenyja na abjom zołatavalutnych reziervaŭ) u 2011 hodzie pieravysiŭ 600%. I choć z taho času hety pakazčyk skaraciŭsia da 350%, jon
Moody's taksama adznačaje: umieranaja acenka ekanamičnaha patencyjału Biełarusi abapirajecca na vysoki realny temp rostu VUP, jaki ŭ 2000–2011 hadach składaŭ u siarednim 7% štohod, šmathalinovy pramysłovy siektar i adnosna vysoki ŭzrovień dachodu na dušu nasielnictva i dobraja adukacyja pracoŭnaj siły, jakaja padtrymlivaje vysoki prafiesijny ŭzrovień dziakujučy nizkamu ŭzroŭniu biespracoŭja.
«Ź inšaha boku rost usio bolš zaležyć ad źniešniaha doŭhu i źjaŭlajecca ŭraźlivym da vahańniaŭ źniešnich finansavych patokaŭ, — havorycca ŭ paviedamleńni.— Akramia taho, mižnarodnyja daśledavańni aceńvajuć jakaść kiraŭnickaha aparatu Biełarusi, efiektyŭnaść narmatyŭnych aktaŭ i sudovaj sistemy jak vielmi nizkija ŭ paraŭnańni ź inšymi krainami. Instytucyjny patencyjał asłablaje adsutnaść pradkazalnaj i prazrystaj palityki, a taksama hramadskich debataŭ pa pytańniach ekanamičnaj palityki».
Pavodle acenki analitykaŭ Moody's, deficyt biudžetu ŭ Biełarusi nižejšy, čym u inšych krain z anałahičnym rejtynham.Razam z tym finansavaje stanovišča ŭrada zdajecca mienš mocnym u paraŭnańni ź imi z ulikam raschodaŭ, źviazanych ź mierami pa restrukturyzacyi bankaŭ, čystym kredytavańni finansavych ustanoŭ i zabieśpiačeńniem harantavanaha dziaržavaj doŭhu.
Značnaje pavieličeńnie dziarždoŭhu za apošnija niekalki hadoŭ i vierahodny praciah zaležnaści ad źniešniaha doŭhu dla finansavańnia nacyjanalnych inicyjatyŭ rostu asłablajuć kredytazdolnaść urada Biełarusi, ličyć mižnarodnaje rejtynhavaje ahienctva.
Akramia taho, prykładna 70% pradpryjemstvaŭ Biełarusi, u tym liku bankaŭ, źjaŭlajucca dziaržaŭnymi, i lubyja mahčymyja ich straty ŭjaŭlajuć saboj umoŭnyja abaviazacielstvy ŭrada, adznačajuć ekśpierty Moody's.
Krytyčna aceńvajuć pierśpiektyvy biełaruskaj ekanomiki ŭ adsutnaść strukturnych reform i analityki Suśvietnaha banka.
U Krainavym ekanamičnym miemarandumie SB dla Biełarusi, jaki byŭ prezientavany ŭ Minsku 10 lipienia, adznačajecca: ekanamičny rost u apošniaje dziesiacihodździe zabiaśpiečvaŭsia hałoŭnym čynam za košt faktaraŭ, jakija nie spryjali pavyšeńniu kankurentazdolnaści nacyjanalnaj ekanomiki. Adnoj z asnoŭnych pryčyn ekanamičnaha rostu ŭ Biełarusi byli tannyja enierhanośbity.
Pavodle acenki ekśpiertaŭ SB, Biełarusi nieabchodna pajści na strukturnyja reformy.Heta dazvolić vyrašyć niekalki fundamientalnych prablem, a mienavita: pieraraźmierkavać pracoŭnyja resursy i kapitał na karyść siehmientaŭ ekanomiki z vysokaj pradukcyjnaściu; ažyćciavić restrukturyzacyju siektara dziaržpradpryjemstvaŭ; pavialičyć rolu pryvatnaha siektara i siektara pasłuh u ekanomicy.
«Paśpiachova vyrašyŭšy hetyja zadačy, Biełaruś ažyvić svaje kankurentazdolnyja siehmienty ekanomiki i raskryje niavykarystanyja mahčymaści dla ekanamičnaha rostu.Heta taksama skarocić zaležnaść ekanomiki ad pastavak enierhanośbitaŭ z Rasii pa zanižanych cenach i dazvolić joj padniacca ŭvierch u łancužku stvareńnia koštu ŭ miežach suśvietnaj intehracyi», — adznačajecca ŭ miemarandumie SB.
