Bialacki: «Tracina atrada vyzvalajecca, ale nie ja» 10

Łukašenka 9 lipienia padpisaŭ zakon «Ab amnistyi niekatorych katehoryj asob, jakija ŭčynili złačynstvy». Tekst adpaviednaha narmatyŭnaha pravavoha akta zarehistravany 10 lipienia ŭ Nacyjanalnym rejestry pravavych aktaŭ, piša BiełTA.

Jak paviedamlałasia,

dakumient praduhledžvaje, što za ździajśnieńnie złačynstvaŭ, jakija nie adnosiacca da ciažkich, buduć amnistavanyja niepaŭnaletnija; ciažarnyja žančyny; žančyny i adzinokija mužčyny, jakija majuć dziaciej u vieku da 18 hadoŭ; asoby piensijnaha vieku; invalidy 1-j i 2-j hrupy; chvoryja aktyŭnymi formami tubierkulozu, adniesienych da 1-j, 2-j, 5-j «A» abo 5-j «B» hrup dyspansiernaha ŭliku; ankałahičnyja chvoryja 2-j, 3-j i 4-j kliničnych hrup; VIČ- infikavanyja z 3-j (pre-ŚNID) i 4-j (ŚNID) stadyjami zachvorvańnia pa kliničnaj kłasifikacyi SAAZ; vieterany bajavych dziejańniaŭ

i inšyja.

Taksama praduhledžvajecca vyzvaleńnie ad pakarańnia

asudžanych za kradziažy šlacham złoŭžyvańnia słužbovymi paŭnamoctvami, prysvajeńnie abo rastratu, kradziažy šlacham vykarystańnia kampjutarnaj techniki, za złačynstvy suprać paradku ažyćciaŭleńnia ekanamičnaj dziejnaści, za złoŭžyvańnie ŭładaj abo słužbovymi paŭnamoctvami.

Ale pry hetym na dzień ustupleńnia ŭ siłu zakona jany pavinny adbyć nie mienš za čverć pryznačanaha terminu.

Akramia taho, mohuć być vyzvalenyja

asoby, u jakich na dzień razhladu materyjałaŭ ab prymianienni amnistyi da zakančeńnia terminu pakarańnia zastajecca mienš za hod

i inšyja.

Nie padpadajuć pad amnistyju asoby (u tym liku i tyja, jakija traplajuć u katehoryi, nazvanyja ŭ inšych artykułach zakonaprajekta), asudžanyja za ździajśnieńnie «złačynstvaŭ, jakija pradstaŭlajuć vialikuju hramadskuju niebiaśpieku». U tym liku heta złačynstvy suprać miru i biaśpieki čałaviectva, suprać dziaržavy, suprać žyćcia i zdaroŭja, suprać połavaj niedatykalnaści. Amnistavanyja nie buduć i tyja, u dačynieńni da kaho ŭžyvałasia amnistyja abo pamiłavańnie ŭ pieryjad ad 2005 da 2012 hoda; na tych, chto na dzień ustupleńnia prysudu ŭ siłu nie kampiensavaŭ ekanamičny ŭron za zroblenaje (akramia lhotnaj katehoryi); tych, čyjo pakarańnie ŭ vyhladzie śmiarotnaha pakarańnia było zamieniena pažyćciovym źniavoleńniem i inš. Amnistyja nie zakranie tych, chto złosna parušaje paradak u papraŭčych ustanovach, a taksama tych, chto dapuściŭ asabliva niebiaśpiečny recydyŭ złačynstvaŭ.

Čakajecca, što amnistyja zakranie kala 7,6 tys. čałaviek. Kala 2 tys. ź ich płanujecca vyzvalić niepasredna ź miescaŭ pazbaŭleńnia voli. Usiaho ŭ Biełarusi źmiaščajecca kala 37 tys. źniavolenych.

«Heta štučna palityzavany zakon, —

kaža pravaabaronca Valancin Stefanovič. — Navinoj u im, proci raniejšych, źjaŭlajecca toje, što ŭ katehoryju artykułaŭ KK, jakija pad amnistyju nie padpadajuć, uklučany

art.342: «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Hety artykuł, zvyčajna kvalifikavany jak «mienš ciažki» ciapier pryroŭnienaje da zabojstva.

A pa 342-m adbyvajuć pakarańni bolšaść palitviaźniaŭ — u tym liku Sieviaryniec, tyja, kamu dali ŭmoŭnyja terminy. Tyja ž

palitviaźni, chto znachodzicca ŭ kałonijach, — usie «złosnyja parušalniki».

U tym liku Aleś Bialacki — taki status jamu dali paśla treciaha spahnańnia. Aleś napisaŭ pra heta ŭ liście, adznačyŭšy: «Tracina atrada vyzvalajecca, ale nie ja», — kaža Valancin Stefanovič.

SM

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH