Damir Bachmietaŭ, dyrektar minskaha «Taksi Udača» (7337), jakoje spyniła svaju pracu 1 lipienia 2012 hoda, vystupiŭ z adkrytaj zajavaj, u jakoj abvinavačvaje čynoŭnikaŭ u sabatažy daručeńniaŭ Alaksandra Łukašenki.
«Inviestaru niemahčyma rabić biznes u krainie, dzie ŭ čynoŭnikaŭ niama zakonnych padstavaŭ dla reahavańnia na słovy prezidenta Łukašenki», — narakaje jon. Pa słovach Bachmietava,
jon šeść razoŭ źviartaŭsia ź listami da Alaksandra i Viktara Łukašenkaŭ, Uładzimira Makieja, a taksama ŭ Saviet Ministraŭ, Dziažkantrol i Ministerstva suviazi i infarmatyzacyi z prośbaj vydzielić «Taksi Udača» svabodny trochznakavy numar.U adkaz jamu napisali, što «zakonnych padstaŭ dla pryniaćcia dadatkovych mier reahavańnia pa vašych zvarotach z boku Administracyi prezidenta Respubliki Biełaruś nie majecca».
Inviestar z Kyrhyzstanu pieraličvaje i inšyja pieraškody, ź jakimi jamu daviałosia sutyknucca padčas raźvićcia biznesu ŭ Biełarusi, u pryvatnaści,
nieabchodnaść zakuplać darahija navapołackija taksamietry pa $300 kožny, jakija źbirajucca na biełaruskim zavodzie z zamiežnych składnikaŭ.
«Usim biznesmenam Biełarusi! Žadajem pośpiechu ŭ vašym biaźmiežnym ciarpieńni pieraadolvać za svoj košt ciažkaści, stvoranyja čynoŭnikami.
My budziem pracavać tam, dzie niama hetych barjeraŭ čynoŭnikam i tam, dzie rady ŭlivańniu našych hrošaj u ekanomiku krainy», —kaža były dyrektar TAA «Taksi Udača» Damir Bachmietaŭ.
* * *
«Taksi Udača» (7337) była stvorana hod tamu, ale ŭłasnaha aŭtaparku nie mieła. Bolšaść kiroŭcaŭ adnačasova prymali zakazy i inšych dyśpietčarskich słužbaŭ. Taksi sprabavała pryvabić pasažyraŭ nizkimi taryfami, a kiroŭcaŭ — samaj nizkaj u horadzie abanienckaj płataj.