Multfilm pra «šalony biełaruski narod» atrymaŭ załaty miedal na Kijeŭskim fiestyvali rekłamy + videa 6

Animacyjny film «Budźma biełarusami!», jaki trapiŭ u šort-listy13-ha Kijeŭskaha Mižnarodnaha fiestyvalu rekłamy ŭ čatyroch naminacyjach adrazu, užo atrymaŭ zołata ŭ naminacyi «animacyja» i bronzu ŭ naminacyi «režysura».

Stvorany ŭ 2011 hodzie rolik pazmahajecca za pieramohu na KMRF jašče ŭ katehoryjach «sacyjalnaja rekłama» i «internet-videa».

Uračystaje ŭznaharodžańnie pieramožcaŭ adbudziecca ŭ Adesie 26 maja. Vyniki Fiestyvalu mohuć stać dobrym padarunkam dla stvaralnikaŭ i amataraŭ filma, jakija adznačać hod z momantu jaho relizu 28 maja.

Za amal hod «žyćcia» animacyjny film staŭ sapraŭdnaj vizitnaj kartkaj Biełarusi ŭ śviecie.

Animacyja była ŭznaharodžanaja na fiestyvalach One Short Film Fest 2012 (1-je miesca ŭ naminacyi «animacyja»), AD.NAK!-2011 (Hran-pry fiestyvalu), «Bieły Kvadrat 2012» (1-je miesca ŭ sacyjalnaj rekłamie) i Uzupis International Film Festival 2011 (śpiecyjalnaja ŭznaharoda). Film demanstravaŭsia na fiestyvalach KROK International Animation festival 2011, Varna International Animation festival 2011, Balkanima International Animation festival 2011, ANIMEST International Animation festival 2011.

Hramadskaja kulturnickaja kampanija «Budźma biełarusami!» spryjaje pazityŭnym pieramienam u biełaruskim hramadstvie, adnoj ź jakich źjaŭlajecca pieraadoleńnie jaho raźjadnanaści praz uzmacnieńnie nacyjanalnaj identyčnaści. Pavodle mierkavańnia sacyjołahaŭ, Biełaruś — kraina «małych, zamknionych sacyjalnych hrup». Adnym sa stereatypaŭ hramadskaj śviadomaści, jaki zaminaje kansalidacyi, źjaŭlajecca mierkavańnie pra nibyta ŭłaścivuju biełarusam «pamiarkoŭnaść», što ŭsprymajecca jak pasiŭnaść, adsutnaść aktyŭnaj hramadskaj pazicyi, a taksama mierkavańnie pra toje, što ŭ biełarusaŭ historyja pačynajecca tolki z 1917 hoda.

Mienavita dziela pieraadoleńnia hetych stereatypaŭ i byŭ stvorany animacyjny film «Budźma biełarusami!». Pačynajučy z 28 traŭnia 2011

film sabraŭ bolš za 1 młn prahladaŭ na roznych videachostynhach.

Kali ŭličvać toje, što karystalnikaŭ interneta ŭ Biełarusi kala piaci miljonaŭ čałaviek, atrymlivajecca, što rolik prahledzieła prykładna piataja častka biełarusaŭ.

Šalonaja papularnaść tłumačycca kreatyvam rekłamista Julii Laškievič, majsterskaj pracaj Julii Rudzickaj, saŭndtrekam u vykanańni Alaksandra Pamidorava, napisanym adnym z samych viadomych muzykaŭ Biełarusi Lavonam Volskim i zładžanaj pracaj kamandy kampanii «Budźma biełarusami!».

Multfilm zrabiŭsia sacyjalnym impieratyvam, vyklikaŭšy ŭ bolšaści hledačoŭ pačućcio honaru za svaju krainu, pakazaŭ ahulnyja dasiahnieńni, realnych hierojaŭ historyi i paspryjaŭ pieraadoleńniu niehatyŭnych šabłonaŭ.

U šort-list13-ha KMFR animacyja trapiła ŭ pryjemnaj kampanii z pracaŭ viadomych biełaruskich ahiencyj AIDA Pioneer, AVC, GETBOB Digital Agency, Forte Grey, PRKVADRAT, Salmon DDB, Smart Group Ogilvy Belarus, TDI Group, a taksama tvorčaj kamandy Aleha Ramanava, Iny Nasovič i Vitala Zacharava.

Tut.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH