U čakańni treciaha tranšu

Ministerstva finansaŭ raźličvaje ŭ najbližejšy tydzień kančatkova ŭzhadnić pazicyi z Antykryzisnym fondam (AKF) JeŭrAzES, vynikam čaho budzie vydzialeńnie Biełarusi treciaha tranša kredytu fondu ŭ pamiery 440 młn. dołaraŭ.

«Na nastupnym tydni my budziem sustrakacca sa śpiecyjalistami Antykryzisnaha fondu, z kiraŭnictvam Ministerstva finansaŭ Rasijskaj Fiederacyi, z tym kab kančatkova ŭzhadnić našy pazicyi», — paviedamiŭ ministr finansaŭ Andrej Charkaviec, adkazvajučy 17 maja na pytańnie padčas pramoj linii, arhanizavanaj Minfinam.

Biełaruski bok, pavodle jaho słoŭ, raźličvaje na stanoŭčy vynik hetaj sustrečy ŭ Astanie.

Prajekt lista ab dziejańniach urada i Nacyjanalnaha banka ŭ śfiery hrašova-kredytnaj palityki «pa apošniaj viersii Ministerstva finansaŭ, maksimalna nabližanaj da prapanoŭ Antykryzisnaha fondu», nakiravany ŭ AKF i zaraz aktyŭna vyvučajecca i analizujecca, skazaŭ ministr.

***

Nahadajem, 21 lutaha kiraŭnicki dyrektar pa zabieśpiačeńni dziejnaści Antykryzisnaha fondu JeŭrAzES, namieśnik staršyni praŭleńnia Jeŭrazijskaha banka raźvićcia (JEABR) Siarhiej Šatałaŭ zajaviŭ, što JEABR, kiraŭnik srodkami AKF, čakaje ad Biełarusi novy list ab namierach, jaki razam z kredytnym pahadnieńniem vyznačaje ŭmovy kredytu, što vydzialajecca Minsku.

3 maja kiraŭnik Nacbanka Nadzieja Jermakova paviedamiła, što Antykryzisny fond patrabuje ad Biełarusi zrabić bolš žorstkimi padychody da kredytavańnia ekanomiki, u pryvatnaści skaracić rost kredytaŭ, kab rost kredytnaha partfiela bankaŭ byŭ mienšym, čym heta praduhledžana asnoŭnymi pakazčykami raźvićcia Biełarusi.

«Miarkuju, heta nie zusim abhruntavana. Parłamient pryniaŭ zakon (ab sacyjalna-ekanamičnych pakazčykach raźvićcia i kirunkach hrašova-kredytnaj palityki. — BiełaPAN.), prezident jaho padpisaŭ, a ciapier fond choča, kab my heta pierahledzieli. Dumaju, što heta nie zusim pravilna», — skazała Jermakova. Zaznačyŭšy, što ciapier nad hetaj temaj pracujuć ekśpierty, kiraŭnik Nacbanka vykazała nadzieju na toje, što «da kanca maja pytańnie vyrašycca».

Varta zaznačyć, što raniej Biełaruś taksama ŭziała na siabie abaviazacielstvy pierad Antykryzisnym fondam pa abjomie pryvatyzacyi. Zhodna z damoŭlenaściami pa vynikach studzienia-vieraśnia 2012 hoda pastupleńni ad pryvatyzacyi pavinny skłaści 1,2 młrd. dołaraŭ, a pa vynikach hoda — 2,5 młrd. dołaraŭ.

AKF JeŭrAzES stvorany ŭ 2009 hodzie, srodkami fondu kiruje Jeŭrazijski bank raźvićcia. U červieni 2011 hoda Saviet fondu pryniaŭ rašeńnie ab vydzialeńni Biełarusi finansavaha kredytu ŭ 3 młrd. dołaraŭ ZŠA. Da kanca minułaha hoda ŭ Biełaruś pastupili dva tranšy kredytu na ahulnuju sumu 1,24 młrd. dołaraŭ. Treci tranš u pamiery 440 młn. dołaraŭ ZŠA Biełaruś spadziavałasia atrymać u kancy lutaha 2012 hoda, adnak pieramovy pa jaho vydzialeńni dahetul praciahvajucca.

0

0

0

0

0

0

Alaksiej Areška, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH