Užo treci miesiac studenty internata №2 BDU, što na vulicy Kastryčnickaj u Minsku, vymušanyja padymacca na 13-y pavierch pa leśvicy.
«Kazali, što tam złamałasia detal za 60 tysiač rubloŭ, jakuju z Mahileva pavinny pryvieźci. Čakajem užo kolki času, sabrali podpisy (kala 200), adnieśli dyrektaru, nas pasłali»,skardzicca navučeniec Anatol (imia źmienienaje).
Studenty dziviacca, čamu tuju niaščasnuju detal nielha znajści ŭ Minsku, i hatovyja sami nabyć jaje ŭ Mahilovie. Navučency štohod zdajuć hrošy na patreby internata.
«Ale ich traciać na kłumby. Sadziać adnahadovyja kvietki, kožny hod kuplajem novyja!», -- kaža Anatol. I kali jon, chłapiec, da vymušanaj «fizkultury» stavicca łahodna, to dziaŭčaty na abcasach užo paradkam stamilisia. A adna nibyta złamała nahu na leśvicy.
Adzin ź liftaŭ usio ž pracuje, praŭda, tolki na «padjom». Ale vyklikać na pavierch jaho nielha. Tym bolš, heta adziny lift na 850 žycharoŭ.
Lifty ŭ internacie №2 BDU
«Usia sprava ŭ Liftservisie. Niama ŭ ich zapasnych častak. U adnym lifcie złamaŭsia reduktar, u inšym – škif. Usio astatniaje, što ad nas zaležyć, my zrabili, listy dasłali i ŭ Biellift, i ŭ Liftservis»,kaža Ihar Zajac, namieśnik dyrektara studharadka pa administratyŭna-haspadarčaj rabocie.
Što da koštu detalaŭ, to dyrektar studharadka, vidać, pažartavaŭ, nazyvajučy studentam ličbu ŭ 60 tysiač. Pa słovach Ihara Zajca,
škif kaštuje kala 4 miljonaŭ rubloŭ, a reduktar – usie 26 miljonaŭ.