Jak paviedamiła žurnalistam 28 sakavika ŭ Minsku hałoŭny pulmanołah Ministerstva achovy zdaroŭja Iryna Łapcieva, siońnia ŭ Biełarusi na ŭliku z branchijalnaj astmaj znachodziacca bolš jak 60 tys. pacyjentaŭ, a štohod vyjaŭlajecca 300–500 novych chvorych, pieravažna dziaciej.
Razam z tym siaredniejeŭrapiejski ŭzrovień zachvorvańnia na branchijalnuju astmu vyšejšy za biełaruski prykładna ŭ dva razy. Śpiecyjalist tłumačyć heta nie tolki rostam alerhičnych zachvorvańniaŭ, ale i tym, što jeŭrapiejcy bolš uvahi nadajuć svajmu zdaroŭju, pry pieršym padazreńni na zachvorvańnie źviartajučysia da ŭrača. U Biełarusi ž niaredkija vypadki, kali čałaviek z branchijalnaj astmaj, jakaja praciakaje łatentna, nadoŭha adkładvaje vizit da śpiecyjalista abo naohuł da jaho nie źviartajecca.
Adnak u apošnija hady dziakujučy palapšeńniu dyjahnostyki i bolš śviadomamu staŭleńniu hramadzian da zdaroŭja ŭ krainie ŭzrastaje vyjaŭleńnie branchijalnaj astmy na rańniaj stadyi, zaznačyła śpiecyjalist. Pavodle jaje słoŭ, heta dazvalaje zrabić lačeńnie chvorych bolš tannym.
«Naša miedycyna, śpiecyjalisty piarvičnaha źviana značna prasunulisia za apošnija hady ŭ technałohijach antyastmatyčnaj terapii, usio pravodzicca zhodna z rekamiendacyjami Suśvietnaj arhanizacyi achovy zdaroŭja», — zaznačyła Łapcieva. Pavodle jaje słoŭ, dziakujučy hetamu na praciahu apošnich hadoŭ u Biełarusi źnižajucca pakazčyki śmiarotnaści i invalidnaści, źviazanyja z zachvorvańniami. Dla prafiłaktyki astmy śpiecyjalist rekamienduje paźbiahać kantaktu z alerhienami ludziam, jakija schilnyja da prajaŭleńniaŭ alerhii, im taksama nie varta pahardžać lačeńniem hetaha zachvorvańnia.
U jakaści jašče adnaho vykliku sistemie achovy zdaroŭja hałoŭny pulmanołah nazvała chraničnuju abstruktyŭnuju chvarobu lohkich (CHACHŁ). U paraŭnańni ź inšymi chvarobami nižnich dychalnych šlachoŭ jana najbolš časta źjaŭlajecca pryčynaj invalidnaści i śmiarotnaści. CHACHŁ časta vyklikaje kureńnie, jaje raźvićciu taksama sadziejničajuć bytavyja i pramysłovyja zabrudžvalniki navakolnaha asiarodździa.
Razam z branchijalnaj astmaj i CHACHŁ u lik najbolš raspaŭsiudžanych zachvorvańniaŭ nižnich dychalnych šlachoŭ u Biełarusi ŭvachodzić pnieŭmanija, u lačeńni jakoj, zajaviła miedyk, dasiahnuty značnyja pośpiechi. Pavodle źviestak SAAZ, Biełaruś uvachodzić u pieršuju dziasiatku krain Jeŭropy z najmienšym pakazčykam śmiarotnaści ad pnieŭmanii.
Jak zaznačyła Łapcieva, u cełym chvaroby orhanaŭ dychańnia ŭ Biełarusi, jak i ŭ inšych krainach, zajmajuć pa raspaŭsiudžanaści pieršaje miesca.
