«Možaš atrymać 82 tysiačy dalaraŭ, a možaš usio stracić» 4
«MMM» praciahvaje dziejničać, niahledziačy na rejd KDB.
Paśla piatničnaha nalotu na minski ofis piramidy «MMM-2011» nie dumałasia, što niechta ź jaje arhanizataraŭ pojdzie na kantakt. Tamu, kali nabiraŭ numar adnaho z pradstaŭnikoŭ (telefon ubačyŭ na vialikaj abviestcy-rekłamie ŭ Zasłaŭi), asabliva ni na što nie spadziavaŭsia. Ale paśla niepraciahłych hudkoŭ adkazaŭ mužčynski hołas.
«Dobry dzień. Ja telefanuju pa abviestcy nakont układaŭ pad 60 pracentaŭ u miesiac. Možam sustrecca, kab abmierkavać?» — «Tak. Vy ŭ Zasłaŭi?» — «Nie, ale časta byvaju tam». —
«Tady padjazdžajcie ŭ luby dzień».
Damovilisia sustrecca na vakzale čyhunačnaj stancyi «Biełaruś» — tak nazyvajecca jana ŭ Zasłaŭi.
Da mianie padyšoŭ małady čałaviek hadoŭ 25-ci. Nazvaŭsia Ramanam.
Adrazu ŭručyŭ buklet «My možam mnohaje!» z prykładnaj tablicaj rostu ŭkładaŭ, jakaja za hod sa $100 pry samych vysokich pracentach abiacała sumu, u vosiemsot razoŭ bolšuju — $82510.
Ale małady čałaviek paśpiašaŭ prahavaryć, što «MMM-2011» — heta finansavaja piramida, a tamu ŭ luby momant možna ŭsio stracić, a nie tolki zarabić. Hetyja słovy, praŭda, nie ŭsprymajucca, kali ŭ hałavie ŭžo kruciacca sumy ź piaćciu nulami.
«Na sajt Maŭrodzi zachodziŭ?» — «Zachodziŭ, ale tam šmat litar — čytać lanota». Raman pačaŭ tłumačyć sistemu pracy. «Ja — sotnik. Hrošy možaš mnie na rachunak pakłaści. Ale ŭ takim vypadku ja pavinien budu z hetaj sumy spłacić 12 pracentaŭ padatku. Lepš, kab mnie na ruki hrošy pieradaŭ». — «A niejkija dakumienty buduć afarmlacca, harantyja jakija?» — «Nijakich dakumientaŭ.
Chiba tolki ček mahu dać, jaki paćviardžaje, što hrošy ja pakłaŭ sabie na rachunak. Usio budujecca na daviery.
Ja voś mašynu pradaŭ za $2500 i ŭsio pakłaŭ na roznyja ŭkłady. I ciapier maju $1500 štomiesiac, heta z roznymi bonusami».
«A prablem nie budzie? Tut ža supracoŭniki KDB uziali šturmam minski ofis „MMM-2011“?» — «Nie budzie. KDB uvarvaŭsia, ludziej pachapaŭ, ale ničoha pradjavić im nie mohuć. Heta było zroblena dla taho, kab zapužać ludziej, kab hrošy nie nieśli». — «I na dalejšuju pracu heta nijak nie paŭpłyvaje?» — «Dumaju, nie. Chacia ŭsio moža skončycca i praz 3 miesiacy, i praz 6. U 1994-m piramida pracavała paŭhoda. A my ŭžo dziejničajem hod i dva miesiacy. Paśla šumichi z KDB my spynili vypłaty na 5 dzion, kab ludzi ŭ panicy nie kinulisia zabirać układy. Ale zaŭtra [sustreča adbyłasia 19 sakavika — „NN“] adnaŭlajem vypłaty. Voś ja — fizičnaja asoba, niezakonnaj dziejnaściu nie zajmajusia. Chacia ŭ našaj dziaržavie mohuć pasadzić ni za što».
«A na jaki termin u asnoŭnym kładuć hrošy?» — «Na try miesiacy».
— «Čym mienšy termin, tym mienšaja vierahodnaść usio stracić?» — «Tak, ale tady i pracenty mienšyja». I pierad tym, jak raźvitacca, Raman pryvioŭ jašče prykład nibyta svaich siabroŭ. Jany pakłali 50 dalaraŭ na try miesiacy i 50 na hod. Ź pieršych jany majuć utraja bolšuju sumu. «Užo ŭ plusie. A z tymi, što lažać hod… A chto viedaje, što bu-dzie praz hod?»
***
Na staroncy hrupy «MMM-2011 u Biełarusi» «Vkontaktie» raźmiaščajucca numary telefonaŭ tak zvanych dziasiatnikaŭ. Nabirajem Antona ź Minska. Jon skazaŭ, što «praca prypyniena da lepšych časoŭ». Siarhiej z Homiela adznačyŭ, što «na ščaście ci na žal, užo nie zajmajecca hetym». A minčuk Pavieł byŭ ździŭleny, što jaho kantakty jašče niedzie jość, bo ich jak dziasiatnik nidzie nie pakidaŭ. «Vy majecie dačynieńnie da «MMM-2011»? — «Tak, ale tolki jak udzielnik». — «Praz Vas možna stać taksama udzielnikam piramidy?» — «Nie».
