15 lutaha
Internet‑kaviarni ŭ kipciurach KDB
Ciapier uładalnik internet‑kaviarni abo ŭpaŭnavažanaja im asoba abaviazanyja vieści žurnał damennych imionaŭ sajtaŭ, da jakich karystalniki atrymlivali dostup. Žurnał pavinien zachoŭvacca nia mienš jak 12 miesiacaŭ i padavacca pry nieabchodnaści supracoŭnikam dziaržbiaśpieki, pravaachoŭnym orhanam i orhanam dziaržkantrolu. Adpaviednyja pałažeńni źmieščanyja ŭ pastanovie, jakuju pryniaŭ biełaruski ŭrad «u metach rehulavańnia adnosinaŭ u sfery ažyćciaŭleńnia dziejnaści kamputarnych klubaŭ i internet‑kaviarniaŭ».
16 lutaha
Sajuzu levych partyj admoŭlena ŭ rehistracyi
Ministerstva justycyi admoviła ŭ dziaržaŭnaj rehistracyi Sajuzu palityčnych partyj «Sajuz levych partyjaŭ». SŁP zakidajuć parušeńnie vyznačanaha paradku stvareńnia sajuza: zhodna ź dziejnym zakanadaŭstvam, dziejnaść palityčnych partyjaŭ, zarehistravanych u Biełarusi, moža raspaŭsiudžvacca tolki na terytoryju Biełarusi.
Akramia taho, pavodle Ministerstva justycyi, praviadzieńnie kanferencyi ŭ Čarnihavie supravadžałasia nieadnarazovymi parušeńniami zakanadaŭstva.
Amerykanskich hramadzianaŭ departavali ź Biełarusi
Dziesiacioch hramadzianaŭ ZŠA, jakich źvinavacili ŭ parušeńni praviłaŭ znachodžańnia ŭ krainie, departavali ź Biełarusi. Pavodle aficyjnaha tłumačeńnia, zamiežnyja hramadzianie nibyta niezakonna vykładali j ažyćciaŭlali relihijnuju dziejnaść. Usie amerykancy aštrafavanyja na adnu bazavuju vieličyniu. Im zabaranili naviedvać Biełaruś ciaham dvuch hadoŭ. Amerykancaŭ zaprasiła abjadnańnie «Stefanus» — u miežach dabračynnaj akcyi «Anhielskaja mova dla ŭsich» jany viali biaspłatnyja praktykumy anhielskaj movy. Zaniatki prachodzili ŭ carkvie Evanhielskich chryścijanaŭ‑baptystaŭ.
Alaksandru Kazulinu praciahnuli režym vychadu z haładoŭki
Administracyja kalonii «Vićba‑3» praciahnuła admysłovy režym dla palitviaźnia Alaksandra Kazulina, u jakoha paśla spynieńnia 53‑trochdzionnaj haładoŭki rezka pahoršała zdaroŭje. Raniej advakatam i svajakam asudžanaha ŭ kalonii kazali, što 15 lutaha Alaksandra Kazulina pieraviaduć na zvyčajny režym utrymańnia i prymusiać iznoŭ pracavać. Ciapier A. Kazulin pa‑raniejšamu maje prava nie vychodzić na pracu — jaho hladziać lekary, jon atrymlivaje admysłovaje charčavańnie z ulikam byłoj haładoŭki.
Dzień Salidarnaści ŭ Miensku
Kala sta moładzievych aktyvistaŭ prajšli z zapalenymi śviečkami pa praspekcie Francyska Skaryny ŭ Miensku. Takim čynam maładyja biełarusy vykazali salidarnaść z palitviaźniami i siemjami źnikłych apazycyjaneraŭ. Supracoŭniki AMONu ciaham akcyi supravadžali moładzievych aktyvistaŭ, a ŭ skvery imia Janki Kupały, kali ludzi pastavili śviečki na ziamlu, zataptali ahieńčyki nahami. Nikoha z udzielnikaŭ akcyi, tym nia mienš, nie zatrymali.
Na ścianie kinateatru «Kastryčnik» i na moście kala Čyhunačnaha vakzału źjavilisia raściažki z nadpisam «Svabodu palitviaźniam!»
…u Babrujsku
Čarhovaja akcyja, pryśviečanaja Dniu biełaruskaj salidarnaści, u Babrujsku prajšła bieź pieraškodaŭ z boku supracoŭnikaŭ milicyi. Ludzi sabralisia z zapalenymi śviečkami kala kaplicy na vuł.Mienskaj.
19 lutaha
Spravu Chviedaruka pieradali ŭ prakuraturu
Moładzievy aktyvist Źmicier Chviedaruk, suprać jakoha razam z Aleham Korbanam 4 lutaha była zaviedziena kryminalnaja sprava za dziejnaść ad imia niezarehistravanaha «Maładoha Frontu», atrymaŭ aficyjnaje paviedamleńnie ab tym, što sprava była pieradadzienaja ŭ prakuraturu. Pastanova padpisanaja kapitanam KDB Dźmitryjem Śvistunom. Tym samym, što kiravaŭ dziejańniami supracoŭnikaŭ PMSN padčas zatrymańnia ŭdzielnikaŭ pasiedžańnia Centralnaj Rady MF 4 lutaha.
20 lutaha
Sprava carkvy «Novaje žyćcio» pieraniesienaja ŭ čarhovy raz
Pryčynaj pieranosu stała niajaŭka praŭnika Mienharvykankamu Ihara Kaśpiaroviča. Heta ŭžo treci pieranos spravy pa jaho vinie. Na pasiedžańnie źjavilisia dva pradstaŭniki Mienharvykankamu, kožny ź jakich, pa śviedčańni praŭnika carkvy Siarhieja Łukanina, mieŭ paŭnamoctvy dla viadzieńnia spravy. Adnak pradstaŭnica adździełu pa spravach relihijaŭ Mienharvykankamu Alena Radčanka inicyjavała pieranos spravy na čaćvier.
