Piatničnaja pres-kanferencyja tak i nie dała adnaznačnaha adkazu na pytańnie, ź jakoj metaj u našu krainu pryjaždžaŭ kiraŭnik PARE Rene van der Linden. U adroźnieńnie ad listapadaŭskaha vizytu kiraŭnika pradstaŭnictva Eŭrakamisii va Ŭkrainie i Biełarusi Ijena Boŭha, jaki pryvioz biełaruskim uładam kankretnyja prapanovy, pry vykanańni jakich aficyjny Miensk moža zajmieć roznyja ekanamičnyja vyhody, vizyt van der Lindena ŭ mnohim zastajecca zahadkaj.
Zbolšaha halandziec u piatnicu havaryŭ ahulnymi słovami pra toje, što dla PARE pryjarytetnym źjaŭlajecca pytańnie pravoŭ čałavieka va ŭsim śviecie, jon raskazvaŭ, jak PARE i jon asabista spryčynilisia da demakratyzacyi ŭ roznych kutkach planety. Taksama havaryŭ pra toje, čamu tak važna padtrymlivać pravy čałavieka, mieć mocnuju apazycyi dla narmalnaha raźvićcia kožnaj krainy.
Palityk dziakavaŭ biełaruskim uładam za toje, što jany vykanali ŭsie svaje abaviazki pa pryjomie eŭračynoŭnika ŭ Miensku. Adzinym niavykananym punktam zastałasia jahonaja susteča z Alaksandram Kazulinym, ale van der Linden nie atrymaŭ na jaje dazvołu. Zamiest hetaha jon sustreŭsia z žonkaj Kazulina Irynaj, a taksama paprasiŭ śpikiera pałaty pradstaŭnikoŭ Uładzimiera Kanaplova, kab jon paspryjaŭ sustrečy pasła Niamieččyny ŭ Biełarusi Marcina Hiekiera z Alaksandram Kazulinym, na što atrymaŭ zhodu.
Van der Linden zastaŭsia zadavolenym vynikam vizytu, padčas jakoha jon mieŭ sustrečy z pradstaŭnikami ŭładaŭ, apazycyi, a taksama sa studentami. Halandziec adznačyŭ, što ŭbačyŭ na prykładzie moładzi žadańnie intehracyi Biełarusi z Eŭropaj.
Siarod inšaha eŭrakamisar pryznaŭ, što pryčynaj jahonaha vizytu ŭ Miensk źjaŭlajecca paharšeńnie biełaruska-rasiejskich adnosinaŭ. “My ŭbačyli, što Biełaruś, jak nikoli, hotovaja da dyjalohu z Eŭropaj. Kali ŭ eŭrapiejskich strukturach daviedalisia pra moj vizyt u Miensk, to na moj bok było šmat rezkich słovaŭ i krytyki, ale ja nie škaduju, što pryjechaŭ siudy. Ja zaklikaju biełaruskija ŭłady da dyjalohu”, -- skazaŭ van der Linden.
Eŭropa čakaje pazytyŭnych krokaŭ u pytańni pravoŭ čałavieka, a najpierš vyzvaleńnia ŭsich biełaruskich palitviaźniaŭ. Pry hetym van der Linden adznačyŭ, što nia viedaje ŭvohule, ci jość jany ŭ Biełarusi: “Hetaje pytańnie pavinna vyrašyć admysłovaja hrupa”, -- kaža van der Linden.
Taksama staršynia PARE skazaŭ, što nie čakaŭ mnohaha ad svajho pieršaha vizytu ŭ Miensk: “Hałoŭnaje ciapier – namacać dyjaloh, pa jakim pojdzie našaje dalejšaje supracoŭnictva. Nia vyklučana, što ŭ ramkach svaich nastupnych vizytaŭ ja budu mieć sustreču z kiraŭnikom dziaržavy Alaksandram Łukašenkam”. Takim čynam van der Linen pryznaje, što heta jahony nie apošni viizyt u Miensk.
Van der Linden nia daŭ adnaznačnaha i zrazumiełaha adkazu na pytańni datyčna taho, ci abmiarkoŭvaŭ jon ź biełaruskimi aficyjnymi pradstaŭnikami pytańni źnikłych palitykaŭ i ŭcisku niezaležnaj presy. “Ja razumieju, što nielha źmianić hramadztva za adnu noč, niemahčyma za raz dałučyć Biełaruś da zachodnich kaštoŭnaściaŭ. Važna, nakolki chutka pojduć pracesy źmienaŭ u biełaruskim hramadztvie... Ja zachaplajusia mužnaściu biełaruskich žurnalistaŭ i pravaabaroncaŭ, ale prablemy sa svabodaj ŚMI jość nia tolki ŭ Biełarusi, ale i ŭ Rasiei, Azerbajdžanie...
Rabicie svaju spravu tak, jak vy robicie ciapier, i dalej i heta budzie vaš najbolšy ŭniosak u raźvićcio demakratyi ŭ Biełarusi”, -- zaklikaŭ biełaruskich žurnalistaŭ van der Linden.
“Ja nie naležu da tych palitykaŭ, jakija kažuć, što nia buduć vieści dyjaloh da toj pary, pakul nia buduć ahułam vykananyja ŭsie patrabavańni, ja prychilnik pakrokavaj stratehii raźvićcia adnosinaŭ”, -- kaža eŭračynoŭnik. Razam z tym van der Linden nia daŭ zrazumieć žurnalistam, jakija kankretnyja plusy budzie mieć Biełaruś ad ustupleńnia ŭ PARE. Nie było ahučana bolej nivodnaha patrabavańnia PARE, aproč vyzvaleńnia palitviaźniaŭ. Składvajecca ŭražańnie, što albo van der Linden nie da kanca razumieje biełaruskaju sytuacyju, albo my bačym tolki viaršyniu ajsberha.
Zrešty, peŭny sens u vizycie staršyni PARE bačycca, kali ŭličyć, što dałučeńnie da Rady Eŭropy ekanamična nie daje ŭradu Łukašenki ničoha, a palityčna -- aznačaje novyja abaviazki i dadatkovyja kantakty z Eŭropaj. I “chto ad hetaha vyjhraje?” – jak pytalisia ŭ halandca žurnalisty BT.
Fota Julii Daraškievič
