Pa fakcie praniknieńnia nočču ŭ Minski mietrapaliten hrupy maładych ludziej viadziecca rasśledavańnie. Pra heta paviedamiŭ Alaksandr Łukašenka siońnia na naradzie ab chodzie rasśledavańnia abstavinaŭ vybuchu na stancyi «Kastryčnickaja» Minskaha mietrapalitena.
Alaksandr Łukašenka skazaŭ, što jamu paviedamili ab videaroliku, jaki niadaŭna źjaviŭsia ŭ Internecie. «Jany z chłopcami pranikli nočču ŭ mietrapaliten i zdymali heta ŭsio na videa. Vykłali heta ŭ Internet: hladzicie — voś jak pracuje naša milicyja i ŭsie inšyja na čale z Malcavym [dziaržsakratar Rady Biaśpieki Leanid Malcaŭ], jak jany zabiaśpiečvajuć vykanańnie daručeńniaŭ prezidenta», — skazaŭ Łukašenka.
«Jak mnie dałažyli, rasśledavańnie z hetaj nahody pravodzicca. Dumaju, i z hetaj nahody mianie siońnia prainfarmujuć», — skazaŭ Łukašenka i dadaŭ: «Ja nikoha pakul nie paprakaju i paprakać nie budu. Kali hetyja fakty paćvierdziacca — zaŭtra biez pahonaŭ zastanieciesia» .
Nahadajem, karystalnik Aolyellowman źmiaściŭ na YouTube videarolik, nahladna demanstruje ŭraźlivaść Minskaha mietrapalitena dla patencyjnych terarystaŭ u načny čas. Na videa vidać, jak hrupa maładych nie całkam ćviarozych ludziej pranikaje na stancyju praz zvyčajny ŭvachod. Na stancyi ciomna, ale bačny elektronny hadzińnik nad šlachami. Čas — 3.49. Čuvać, jak adzin z udzielnikaŭ «ŭvarvańnia» pramaŭlaje: «Stancyja «Maskoŭskaja», čaćviortaja hadzina nočy, navat nie zamknuli dźviarej. Možna luby terakt, b… , zrabić». Miarkujučy pa kadrach, u načnym «nalocie» na mietro ŭdzielničali 3 čałavieki.
