Majstar i Marharyta (Mastier i Marharita)
Rasieja, 1994, kalarovy, 113 chv.
Režysior: Jury Kara
Roli vykonvajuć: Viktar Rakaŭ, Anastasija Viarcinskaja, Valancin Haft, Mikałaj Burlajeŭ, Michaił Uljanaŭ, Siarhiej Harmaš, Alaksandr Filipienka, Leanid Kuraŭloŭ, Leŭ Duraŭ, Siarhiej Nikanienka, Uładzimir Ściakłoŭ
Žanr: Mistyka-satyryčnaja drama pavodle adnajmiennaha ramanu Michaiła Bułhakava
Adznaka: 7 (z 10)
«Majstar i Marharyta» Juryja Kary byŭ adnym z sama zahadkavych filmaŭ. Kali ŭ 1994 hodzie stužka pavodle «praklataha ramanu» była źniataja, to adrazu źnikła ŭ siejfach pradusaraŭ — i nichto karcinu nie bačyŭ. Potym
było zajaŭlena, što film zhubleny.A kali jon usio ž taki adšukaŭsia, pretenzii vyłučyŭ naščadak Bułhakava, jaki nie chacieŭ vypuskać film na ekran. Ale praz 17 hadoŭ paśla pastanoŭki — premjera ŭviaźnienaj stužki.
Hledačy, jakija pryzvyčailisia da halivudskich efiektaŭ, ździŭleny strymanaściu fantazij: kot Biehiemot — aktor Viktar Paŭłaŭ u hrymie. Zamiest škiletaŭ, što abrastajuć skuraj i frakam na balavańni ŭ Vołanda — Hitler, Stalin i Piotr Pieršy pry poŭnym paradzie. A palot Marharyty pad muzyku Vahnera — nachabnaja archaičnaść.
Ale
ŭ filmie — cudoŭnaja atmaśfiera času:Maskvy 30-ych hadoŭ — i kinatechniki 90-ych, kali aktorskaje majsterstva jašče nie stała rekłamnaj paŭzaj. Uźvinčanaja muzyka Šnitkie dadaje abiertanoŭ. Jašče važniej, Kara taktoŭna ścišyŭ niekananičnaść jerusalimskich epizodaŭ (nie ŭ apošniuju čarhu, dziakujučy Mikałaju Burlajevu, jaki syhraŭ Ješua i Michaiłu Uljanavu — Ponciju Piłatu).
Na hetym tle zło vyjaviłasia takim, jakim jano jość: kryklivym, falšyvym i mituślivym. Lichamankava-drobiazny Karoŭjeŭ (Alaksandr Filipienka), niaščasny Leanid Kuraŭloŭ, jakoha prymušajuć zdavać valutu (hamieryčny rohat u zali), Haft — Vołand, za teatralnymi žestami jakoha chavajecca niaŭpeŭnienaść. A raskrytykavanaja isteryčna-jurlivaja Anastasija Viarcinskaja ŭ amal esesaŭskich šatach — idealnaja Marharyta.
Stužka Juryja Kary — kaštoŭny rarytet, da jakoha čas dadaje novyja sensy.
