Pošukavik papularnaj sacyjalnaj sietki vydaje dziasiatki vynikaŭ na proźvišča niaźmiennaha kiraŭnika Biełarusi.
Vidavočna, što častka z staronak, pryśviečanych Łukašenku, rabilisia dziela ściobu.
Na hetaj staroncy paznačanaja kananičnaja data naradžeńnia Łukašenki.
A tut stvaralniki staronki nie duryli sabie hałavu dy paznačyli adrazu dźvie daty.
Dyk chto jon?
Prysutnaść kiraŭnikoŭ dziaržavaŭ u sacyjalnych sietkach daŭno nie navina. Abama i Miadźviedzieŭ karystajucca tviteram. U apošniaha jość taksama piersanalnaja staronka i na fejsbuku.
Łukašenka taksama žyva cikavicca internetam. Voś tolki intares hety istotna adroźnivajecca ad zacikaŭlenaściaŭ jahonych kalehaŭ: kali tyja viaduć piersanalnyja staronki ŭ sacyjalnych sietkach, kab stać «bližejšymi da naroda», to Alaksandr Ryhoravič adnym rosčyrkam piara nahnaŭ strachu na ŭvieś Bajnet, padpisaŭšy sumnaviadomy Ukaz №60.
I tym nie mienš, proźvišča Łukašenka možna adšukać u sacyjalnych sietkach. Naprykład, u fejsbuku. Pošukavik papularnaj sacyjalnaj sietki vydaje dziasiatki vynikaŭ na proźvišča niaźmiennaha kiraŭnika Biełarusi. Naturalna, tut sustrakajucca jahonyja ciozki, časta — maładyja ludzi, studenty. Traplajucca staronki Alaksandraŭ Łukašenak biez fotazdymkaŭ i padrabiaznaj infarmacyi.
Bolš za dziasiatak staronak na fejsbuku majuć žančyny z proźviščam Łukašenka, jość navat dźvie Haliny.
Staronak z partretam Alaksandra Ryhoraviča Łukašenki i padrabiaznaj infarmacyjaj pra jaho niekalki. Heta nie piersanalnyja staronki palityka i dadać u siabry takoha Łukašenku niemahčyma, možna tolki pakinuć paznaku «padabajecca/nie padabajecca». Infarmacyja na hetych staronkach maje peŭnyja adroźnieńni. Tak, ź niekatorych ź ich vynikaje, što dzień naradžeńnia Łukašenki prypadaje na 30 žniŭnia, ź inšych — na 31-ha, a jość i takija staronki, dzie stajać abiedźvie daty (najchutčej heta nastupstva letašniaj vałtuźni vakoł daty naradžeńnia Łukašenki, što ŭzarvała Bajnet u Dzień viedaŭ).
Vidavočna, što častka z staronak, pryśviečanych Łukašenku, rabilisia dziela ściobu. Bo jak inakš patłumačyć najaŭnaść u bijahrafičnych źviestkach takich rečaŭ jak manarchizm u jakaści palityčnych pohladaŭ i pravasłaŭny ateist u jakaści pohladaŭ relihijnych.Nie kažučy ŭžo pra takija zacikaŭlenaści, jak łyžy i chakiej.
Vidavočna i toje, što nie va ŭsich z naviednikaŭ usio dobra z pačućciem humaru. Mnohija ź ich vykazvajuć tut svaju padtrymku Łukašenku, jany hatovyja dziela jaho na ŭsio. «Biej diemokratov po riebram, Baťka! Moči ich dubinkami i nie otdavaj stranu prostitutkam!» — piša niechta Stanisłaŭ Folc.
A voś karystalnik Omeltouk Andrei pavinšavaŭ Łukašenku ad imia akrabataŭ i trenieraŭ Viciebskaj spartyŭnaj junačaj škoły alimpijskaha reziervu. Uvohule, šmat vinšavańniaŭ i słovaŭ padtrymki idzie ad internaŭtaŭ z postsavieckich krain.
Siarod zamiežnych pryvitańniaŭ traplajuć i pieraściarohi pra mahčymy zamach.Naprykaład, karystalnik Prevent Papers, u jakoha ŭ zacikaŭlenaściach paznačanyja bijahrafii zabitych palitykaŭ, papiaredžvaje: «Soobŝitie požałujsta, śpiecialnyj (ad-hoc) adries elektronnoj počty Jeho Prievoschoditielstva hospodina Aleksandra Łukašienko, Priezidienta Riespubliki Biełaruś, dla pieriedači lično jemu, siekrietnych dokumientov o prihotovlenii jeho uničtožienija».
Amatary Łukašenki z usiaho śvietu navat abjadnoŭvajucca ŭ supołki. Adna ź ich maje nazvu «Alexander Lukashenko: autentico comunista o revisionista? / Alaksandr Łukašenka: sapraŭdny kamunist abo revizijanist?» U supołku ŭvachodziać italjancy, palaki, rasiejcy. Mnohija ź ich dekłarujuć u svaich profilach lavackija pohlady.
Jak bačym, navat biez asabistaj inicyjatyvy prysutnaść Łukašenki u fejsbuku zabiaśpiečanaja. Inšaje pytańnie, ci staŭ jon ad hetaha «bližejšym da naroda»?
