Prałukašenkaŭski sacyjołah, kiraŭnik analityčnaha centru «JESOOM» Siarhiej Musijenka prakamientavaŭ rašeńni sudoŭ pa spravach Miadźviedzia, Breusa i Haponava.
«Naša Niva»: Čamu prysudy miakčejšyja ŭ paraŭnańni ź minułymi?
Siarhiej Musijenka: Heta rašeńnie suda. Kali jano kamuści nie padabajecca, to moža abskardžvać. Ale, viedajecie, i sprava z «Aŭtaradyjo», i ź siońniašnimi pracesami — heta pazityŭnaja tendencyja. Nichto nie moža mieć absalutnuju racyju na biezalternatyŭnaj asnovie. Sudam heta taksama budzie navuka, što da pracesaŭ treba lepš rychtavacca, bolš detalova. Jak pa mnie, to heta narmalnaje rašeńnie. Ja i raniej mierkavaŭ, što nastupnyja prysudy buduć miakčejšyja.
«NN»: A astatnija viaźni izalataraŭ taksama mohuć być vyzvalenyja?
SM: Ja bolš čym pierakanany, što pracesy buduć spakojnymi. Naziralnikaŭ ža nie prosta tak zaprasili na pracesy. Sudam niama sensu zajmać niavyhadnuju pazicyju, być zaanhažavanymi. Ja dumaju, što supracoŭnictva bolš vyhadnaje za kanfrantacyju. Vieści dyjałoh ź jeŭrastrukturami bolš pravilna. A to tut zaraz tolki niejkija sankcyi ŭvodziać. Miarkuju, nastupnyja rašeńni sudoŭ buduć bolš uzvažanyja.
«NN»: Siońniašnija prysudy nie źviazanyja z paharšeńniem spravaŭ u ekanomicy?
SM: Heta mała źviazanyja rečy. A z čaho vy ŭziali, što stan ekanomiki paharšajecca? Moža, kali b u ekanomicy spravy išli kiepska, to i prysudy byli b bolš žorstkija. Mnie prosta zdajecca, što zdarovy sens pavinien pieramahčy z abodvuch bakoŭ.
«NN»: Prysud rasijanam — heta sproba nie sapsavać adnosiny z uschodniaj susiedkaj?
SM: Razumiejecie, pazicyi bolš vyvažvajucca. Viadoma, što spravy majuć palityčny kantekst, źviazany z vybarami, z nastupnymi sankcyjami. I prymajučy rašeńni, treba taksama dumać pra ich nastupstvy.
«NN»: Na Vaš pohlad, Minsk i Jeŭrasajuz jašče majuć šancy adnavić narmalnyja stasunki?
SM: Jany nie byli stračanyja navat u pieršy dzień. Davajcie pryznajemsia, što nichto z našych i nichto ź jeŭrapiejcaŭ nie chacieŭ čuć adno adnoha. Treba stvarać niejkuju rabočuju hrupu sumiesnuju, jak było pa spravie Biabienina. Ničoha strašnaha ŭ hetym niama. Čym bolš my supracoŭničajem, tym lepš.
