Viciebski abłasny sud vyzvaliŭ Mikałaja Razumava z «chimii» 2

Mikałaj Razumaŭ — kolišni lider rabočaha ruchu z Voršy — adbyvaŭ pakarańnie za paklop na Alaksandra Łukašenku. Jon byŭ asudžany jašče ŭ 2006-m hodzie, ale ŭ specustanovu jaho skiravali tolki ŭ listapadzie 2010-ha. Ciapier jaho vyzvalili, bo pavodle artykuła 84 Kryminalnaha kodeksu «skončyŭsia termin daŭnaści vykanańnia prysudu».

Były rabočy lider, jaki ŭ 1991-m hodzie arhanizavaŭ masavy strajk i vyvieŭ aršanskich rabočych na rejki z patrabavańniem hlabalnych ekanamičnych reformaŭ u dziaržavie, u červieni 2006-ha hodu byŭ asudžany na try hady «chimii». Aršanski haradzki sud pryznaŭ Mikałaja Razumava vinavatym u paklopie na prezydenta krainy — za vystup padčas pazaminułaj prezydenckaj kampanii na sustrečy Alaksandra Milinkieviča z aršanskimi vybarcami.Tady spadar Razumaŭ zajaviŭ, što Alaksandar Łukašenka maje dačynieńnie da zabojstva Viktara Hančara i astatnich źnikłych palitykaŭ.

Aršanskaja prakuratura zaviała z hetaj nahody kryminalnuju spravu i skiravała zatrymanaha aktyvista na psychijatryčnuju ekspertyzu. Ekspertyza pryznała stan jahonaj psychiki narmalnym, ale Mikałaja Razumava, jaki maje hrupu invalidnaści, pa stanie zdaroŭja na «chimiju» tady tak i nie nakiravali. U viciebskuju «papraŭčuju ŭstanovu № 11» jon trapiŭ tolki letaś u listapadzie.

Miascovyja demakratyčnyja aktyvisty miarkujuć, što napiaredadni prezydenckich vybaraŭ kolišni rabočy lider byŭ iznoŭ zaličany ŭ šerah «niebiaśpiečnych asobaŭ». Choć prykancy 1990-ch Mikałaj Razumaŭ adyšoŭ ad hramadzkaj dziejnaści i nie prajaŭlaŭ nijakaje palityčnaje aktyŭnaści, aprača taho samaha vystupu na ŭžo daŭniaj pieradvybarčaj sustrečy z Alaksandram Milinkievičam.

Aktyvisty nie vyklučajuć, što trymańnie Mikałaja Razumava pad vartaj na praciahu bolš jak troch miesiacaŭ było niezakonnym, bo z momantu prysudu prajšło bolš za čatyry hady. U toj čas, pakul jon znachodziŭsia ŭ Viciebsku na «chimii», siamji Mikałaja Razumava, dzie hadujucca čaćviera dziaciej, dapamahali aršanskija i viciebskija aktyvisty kampanii «Havary praŭdu!» dy pradstaŭniki roznych demakratyčnych partyj i ruchaŭ.

0

0

0

0

0

0

Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH