Žurnalistku «Biełsata» vyklikali ŭ KDB u spravie Biabienina?

Na dopyt vyklikali Viktoryju Kołčynu, jakaja zdymaje dla telekanała «Biełsat» film pra zahinułych žurnalistaŭ.

Žurnalistku Viktoryju Kołčynu pa telefonie vyklikali na dopyt u KDB. Jon adbudziecca 6 studzienia, a 12 hadzinie. U razmovie joj patłumačyli, što chočuć

«parazmaŭlać nakont Źmiciera Bandarenki».

Źmicier Bandarenka, davieranaja asoba Andreja Sańnikava (jak i jon sam) utrymlivajecca ŭ izalatary KDB u Miensku. Jamu vystaŭlena abvinavačvańnie ŭ arhanizacyi masavych biesparadkaŭ u biełaruskaj stalicy 19 śniežnia. Źmicier Bandarenka byŭ taksama siabram Aleha Biabienina.

Viktoryja Kołčyna ciapier zdymaje dla telekanału film pra biełaruskich žurnalistaŭ, jakija zahinuli ŭ vyniku svajoj prafiesijnaj dziejnaści pry niavyśvietlenych abstavinach. U spravie Aleha Biabienina jana niekalki razoŭ sprabavała źviazacca sa Źmicieram Bandarenkam.

***

Nahadajem, cieła Aleha Biabienina znajšli ŭ piatli letaś 3 vieraśnia na jahonaj dačy pad Mienskam. Pavodle aficyjnaj viersii, pryčynaj śmierci stała samahubstva. Siabry i kalehi miarkujuć, što heta zabojstva. Aleh Biabienin zasnavaŭ i kiravaŭ bujnym apazicyjnym internet-resursam«Chartyja-97» (charter97.org). Padčas prezidenckich vybaraŭ jon mieŭsia być adnoj z klučavych asobaŭ u kamandzie Andreja Sańnikava.

Siońnia stała viadoma, što prakuratura Mienskaj vobłaści paŭtorna admoviła raspačynać kryminalnuju spravu pa fakcie śmierci Biabienina.

«Viersija ab samahubstvie nie staviłasia pad sumnieńnie»,

 — cytuje «Interfaks-Zachad» pamočnicu prakurora Mienskaj vobłaści Taćcianu Kalininu. Jana taksama paviedamiła, što padčas dadatkovaj prakurorskaj pravierki «dakładna ŭstalavać» matyvy samahubstva akazałasia niemahčyma.

belsat.eu

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH