Sudździa Čyhunačnaha rajsudu Viciebska Alena Cyhankova admoviłasia sudzić apazycyjanera Barysa Chamajdu, na jakoha milicyjanty skłali pratakoł za niesankcyjanavanaje pikietavańnie.
Viciebski apazycyjaner, jakoha zatrymali za toje, što jon vyjšaŭ u centar Viciebsku pad bieł-čyrvona-biełym ściaham, paviedamiŭ pra svajo časovaje vyzvaleńnie. Jaho ŭžo byli zavieźli ŭ Čyhunačny rajsud, kab sudzić pavodle składzienaha supracoŭnikami milicyi pratakołu, ale sudździa Alena Cyhankova admoviłasia raźbirać jahonuju spravu. Jana skazała, što pratakoł składzieny niapravilna: milicyjanty nie ŭličyli, što za administracyjnaje pravaparušeńnie Barysa Chamajdu zatrymali paŭtorna.
Apazycyjanera adpuścili, paviedamiŭšy, što jon musić čakać pozvy ŭ sud, kali pratakoł budzie pierapisany. U Čyhunačnym RAUS jamu viarnuli zabrany padčas zatrymańnia bieł-čyrvona-bieły ściah. Barys Chamajda 3-ha studzienia raspačaŭ biesterminovuju akcyju «2011 hod — hod nacyjanalnaha ściaha», pryśviečanuju 20-hodździu biełaruskaj niezaležnaści. Ale ŭ pieršy ž dzień jaho zatrymali, kali ad pačatku akcyi nie prajšło j adnoj chviliny.
Sens svaje akcyi viciebski apazycyjaner patłumačyŭ tak: «U 1991 hodzie naša kraina stała niezaležnaj dziaržavaj. Niezaležnaść pačynałasia z taho, što bieł-čyrvona-bieły ściah i hierb «Pahonia» byli pryznanyja dziaržaŭnymi. Tamu ja štodnia budu vychodzić da tak zvanaha „siniaha doma“ — doma № 28 pa vulicy Lenina — z našym nacyjanalnym ściaham. Kali mianie pačnuć za heta pieraśledavać, to budzie zrazumieła, što biełaruskija ŭłady suprać niezaležnaści našaj krainy».
Zaŭtra Barys Chamajda miarkuje praciahvać akcyju.
Radyjo Svaboda
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH