Tadevušu Kandrusieviču — 65 hadoŭ 10

Siońnia śviatkuje 65-hodździe arcybiskup mitrapalit Minska-Mahiloŭski Tadevuš Kandrusievič, jaki ź vieraśnia 2007 h. kiruje katalickaj carkvoj u Biełarusi.

Z hetaj nahody ŭ archikatedralnym kaściole Najśviaciejšaj Panny Maryi ŭ Minsku, a 18.30 raspačniecca ŭračystaja imša. Archipastyra pavinšujuć śviatary, vierniki, pradstaŭniki ŭłady.

Tadevuš Kandrusievič naradziŭsia 3 studzienia 1946 u vioscy Adelsk niepadalok ad Hrodna ŭ siamji Ihnata i Hanny Kandrusievičaŭ.

Paśla zakančeńnia siaredniaj škoły ŭ 1962 T.Kandrusievič pastupiŭ na fizika-matematyčny fakultet Hrodzienskaha piedinstytuta, adkul praz hod pavinien byŭ syści ŭ suviazi z abvinavačvańniami ŭ tym, što jon rehularna naviedvaje kaścioł i ŭdzielničaje ŭ nabaženstvach. Adpracavaŭšy hod u prajektna-budaŭničaj arhanizacyi ŭ Hrodnie, u 1964 pastupiŭ na enierhamašynabudaŭničy fakultet Leninhradskaha politechničnaha instytuta, jaki skončyŭ u 1970 z dypłomam inžyniera-miechanika pa śpiecyjalnaści «hidraŭličnyja mašyny i srodki aŭtamatyki».

Pracavaŭ inžynieram na Vilenskim zavodzie šlifavalnych stankoŭ: napačatku ŭ zboračnym cechu, potym — u kanstruktarskim biuro. U składzie hrupy inžynieraŭ atrymaŭ aŭtarskaje paśviedčańnie na vynachodku «Pramysłovy ŭzor śpiecyjalnaha vysakachutkasnaha šlifavalnaha stanka dla Vołžskaha aŭtamabilnaha zavoda».

U 1976 pastupiŭ u Duchoŭnuju sieminaryju ŭ Koŭnie, jakuju skončyŭ u 1981 i 31 maja taho ž hoda pryniaŭ śviatarskaje paśviačeńnie z ruk biskupa Ludasa Paviłonisa.

U 1981–1988 pracavaŭ vikaryjem u vilenskich kaściołach. 13 lutaha 1988 byŭ pryznačany probaščam hrodzienskich parafij Maci Božaj Aniolskaj (były franciškanski kaścioł) i sv. Franciška Ksaveryja (katedra). U 1988 u Kaunasie abaraniŭ dysiertacyju na temu «Pahłybleńnie vučeńnia pra Kaścioł u pracach II Vatykanskaha Saboru i ŭ jaho dakumientach» i atrymaŭ navukovuju stupień doktara teałohii.

25 lipienia 1989 Jan Pavieł II pryznačyŭ ks. Tadevuša Kandrusieviča tytularnym biskupam Hipona-Dzaryckim i Apostalskim Administrataram Minskaj dyjacezii dla katolikaŭ u Biełarusi. Tadevuš Kandrusievič zasnavaŭ Hrodzienskuju vyšejšuju duchoŭnuju sieminaryju, spryjaŭ viartańniu i adkryćciu kala 100 raniej začynienych kaściołaŭ, a taksama pryčyniŭsia da vydańnia «Paradku Imšy» i «Katechizisu» na biełaruskaj movie, raspačaŭšy takim čynam spravu adradžeńnia Kaścioła ŭ Biełarusi, z pośpiecham praciahnutuju jaho nastupnikam kardynałam Kazimiram Śviontkam.

13 krasavika 1991 Tadevuš Kandrusievič byŭ mienavany arcybiskupam i pryznačany Apostalskim Administrataram dla katolikaŭ łacinskaha abradu jeŭrapiejskaj častki Rasii.

21 vieraśnia 2007 Bieniedykt XVI mienavaŭ Tadevuša Kandrusieviča arcybiskupam Mitrapalitam Minska-Mahiloŭskim, pieravioŭšy jaho z archidyjacezii Maci Božaj u Maskvie.

Redakcyja «Našaj Nivy» dałučajecca da najščyrejšych vinšavańniaŭ. Mnohaja leta!

0

0

0

0

0

0

Pavodle catholic.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH