Siońnia adbyłasia sustreča byłoha kandydata ŭ prezidenty Jarasłava Ramančuka i dziejnaha kiraŭnika krainy Alaksandra Łukašenki. Inicyjavała sustreču Administracyja prezidenta.

 Fota BiełTA.

Fota BiełTA.

Jarasłaŭ Ramančuk raspavioŭ «NN» ab jaje akaličnaściach: «Siońnia, a 15.00 mnie patelefanavali z Administracyi i skazali, što jość mahčymaść sustrecca z kiraŭnikom dziaržavy. Ja pahadziŭsia. Karotkaja razmova mieła prajści paśla zaviaršeńnia pres-kanfierencyi Łukašenki ŭ Pałacy respubliki. My pryjechali i čakali tam. Potym padyšoŭ supracoŭnik śpiecsłužbaŭ i pravioŭ mianie da Alaksandra Łukašenki».

Sa słovaŭ spadara Ramančuka, razmova z Łukašenkam datyčyła pieravažna losu kiraŭnika partyi AHP, Anatola Labiedźki.

«Ja zapytaŭsia, za što asudzili Labiedźku? Ci možna raźličvać na jaho vyzvaleńnie ŭ bližejšy čas?. Łukašenka adkazaŭ — «Pahladzim»,
 — paviedamiŭ «Našaj Nivie» Ramančuk. Paśla hetaha Łukašenka jašče pacikaviŭsia ŭ Jarasłava Ramančuka najaŭnaściu prapanovaŭ dla supracoŭnictva ŭ ekanamičnaj śfiery. Namieśnik staršyni AHP paviedamiŭ kiraŭniku dziaržavy, što maje dastatkova šmat napracovak.

***

Nahadajem, što siońnia ranicaj Jarasłaŭ Ramančuk vystupiŭ z zajavaj, u jakoj asudziŭ dziejańni Andreja Sańnikava, Vitala Rymašeŭskaha i Mikoły Statkieviča. Zajavu małankava raspaŭsiudzili dziaržaŭnyja ŚMI.

«Naša Niva» źviarnułasia da byłoha kandydata pa kamientar.

«Ja kažu pra toje, što Niaklajeŭ, Sańnikaŭ, Statkievič pavinny adkazać za svaje dziejańni. Akcyja pavinna była być praviedziena zhodna z raniejšymi damoŭlenaściami. My pavinny byli sabracca na Kastryčnickaj płoščy i tam mirna čakać vynikaŭ vybaraŭ.
Adnak biez kansultacyj z maim štabam, sa mnoj, było vyrašana iści da Domu urada», — raspavioŭ karespandentu «NN» Jarasłaŭ Ramančuk.

Palityk taksama dadaŭ, što ličyć dziejańni apazicyi na płoščy Niezaležnaści pravakacyjnymi: «Nu, pajšli pa praśpiekcie. Nu, zaleźli na Lenina… I što dalej? Ja taksama byŭ tam. Bačyŭ, što płana dziejańniaŭ nie było. Hetyja emacyjnyja rečy i skłali padmurak dla biesparadkaŭ».

Jarasłaŭ Ramančuk taksama raspavioŭ, što jamu paviedamili ab płanach uładaŭ «razabracca z palityčnymi partyjami», pradstaŭniki jakich viečaram 19 śniežnia udzielničali ŭ arhanizacyi akcyi pratestu.

«Mnie raspaviali, što ŭłady źbirajucca začynić palityčnyja partyi. Kab vyratavać situacyju, ja i zrabiŭ adpaviednuju zajavu.
Ja liču, što zaraz treba vyzvalić zatrymanych ludziej i pravieści rasśledavańnie, va ŭsim razabracca», — raspavioŭ «NN» Jarasłaŭ Ramančuk.

***

Dadamo taksama, što amal adnačasova ź infarmacyjaj ab sustrečy Ramančuka i Łukašenki źjaviłasia zajava Nacyjanalnaj Rady AHP, u jakoj jana asudžaje siońniašnija vykazvańni namieśnika staršyni partyi AHP.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?