liveinternet.ru
Za apošnija 30 hadoŭ moda na žanočyja imiony ŭ Biełarusi źmianiłasia bolš istotna, čym na mužčynskija.
Takoje mierkavańnie na pres-kanfierencyi 17 śniežnia ŭ Minsku vykazała načalnik adździeła ZAHS Partyzanskaha rajona Minska Valancina Bialajeva.
Pavodle jaje słoŭ, za 11 miesiacaŭ hetaha hoda adździełam zafiksavana 1,5 tys. naradžeńniaŭ. Piaciorka samych papularnych mužčynskich imionaŭ — Daniił, Alaksandr, Arciom, Dźmitryj i Ivan, samych papularnych žanočych — Darja, Anastasija, Ksienija, Hanna i Maryja.
Śpiecyjalist adznačyła, što moda na žanočyja imiony ŭ paraŭnańni z 1980 hodam istotna źmianiłasia. Tak, 20 hadoŭ tamu dziaŭčynak čaściej nazyvali Volha, Taćciana, Natalla, Alena i Śviatłana. U 2010 hodzie ŭ Partyzanskim rajonie naradzilisia pa try Taćciany i Natalli, adna Volha i nivodnaj Aleny i Śviatłany. Razam z tym, moda na mužčynskija imiony pamianiałasia nie tak istotna. U 1980 hodzie samymi papularnymi mužčynskimi imionami byli Siarhiej, Alaksandr, Dźmitryj, Alaksiej i Andrej, jakija i siońnia dastatkova raspaŭsiudžanyja. Adnak, zaŭvažyła Bialajeva, nabyli papularnaść mužčynskija i žanočyja imiony, jakija byli redkaściu ŭ 80-ja: Anastasija, Maryja, Alisa, Kira, Anton, Cimafiej, Jahor, Uładzisłaŭ.
Jak paviedamiła načalnik adździeła ZAHS Maskoŭskaha rajona stalicy Natalla Filimonava, samymi papularnymi imionami siarod chłopčykaŭ sioleta stali Ivan, Arciom, Maksim, Mikita, Daniił, dziaŭčynak — Darja, Anastasija, Maryja, Hanna i Lizavieta. Pry hetym Dašy i Naści ŭtrymlivajuć lidarstva apošnija piać hadoŭ. Sioleta, pavodle jaje słoŭ, u Maskoŭskim rajonie Minska było vydadziena kala 3 tys. paśviedčańniaŭ ab naradžeńni.
Havoračy pra redkija i niezvyčajnyja imiony, jakija davali dzieciam hramadzianie Biełarusi, śpiecyjalisty nazvali: Žaklin, Stefanija, Nikol, Katalina, Ahafja, Estera, Šerhija, Elisija, Fiaŭrońnia, Ciarencij, Ihnat, Trafim, Klimient, Hierardas, Alhierd.
Pavodle słoŭ Filimonavaj, baćki majuć prava vybrać dziciaci luboje imia, jakoje nie supiarečyć normam marali.
Śpiecyjalisty zahsa mohuć tolki pravieści hutarku z baćkami, paraić litaraturu, rekamiendavać jašče raz paraicca adzin z adnym, ale ni ŭ jakim vypadku nie mohuć prapanavać imia dziciaci. U hramadzian Biełarusi dapuskajucca taksama dvajnyja imiony i proźviščy, ale ich pavinna być nie bolš za dva. Čaściej za ŭsio — heta Hanna-Maryja, ale sioleta byŭ vypadak, kali dziaŭčynku nazvali Varvara-Barbara.
Jana zaŭvažyła, što hramadzianin Biełarusi paśla dasiahnieńnia 16-hadovaha ŭzrostu moža pamianiać imia, ale jaho prośba pavinna być abhruntavanaja. Zajavu ab źmienie imia prymajuć zahsy, rašeńnie prymajecca hałoŭnym upraŭleńniem justycyi Minharvykankama. Śpiecyjalisty zaŭvažyli, što vypadki źmieny imia ŭ ich praktycy — adzinkavyja, čaściej za ŭsio žonka mianiaje proźvišča paśla šlubu.
Taćciana Daraščonak, BiełaPAN.
