U noč z 26 na 27 listapada pradstaŭniki pravaachoŭnych orhanaŭ praviali pieratrus na kvatery pradprymalnika i žurnalista Siarhieja Bałykina.
Jany pradjavili order na pieratrus z nahody jaho mahčymaha dačynieńnia da vybuchu ŭnačy z 3 na 4 lipienia 2008 hodu. Pavodle Bałykina, hety order byŭ vydadzieny biez sankcyi prakurora, pa aperatyŭnaj nieabchodnaści. Padčas pieratrusu milicyjanty šukali vybuchovyja rečyvy. U vyniku kanfiskavali čatyry mabilnyja telefony i kamputar.
Paśla hetaha Siarhieja Bałykina zavieźli ŭ Pieršamajski RUUS «dla hutarki», dzie jaho pratrymali da 4 hadzinaŭ ranicy.
Bałykin: «Jany pytalisia pra maje palityčnyja pohlady, pra majo siabroŭstva ŭ AHP, pra maje pajezdki za miažu, z kim ja tam sustrakajusia i jak časta tudy ježdžu, pytalisia, ci vykonvaju ja niejkija zadańni na zahad zamiežnych vyviedak. Taksama spytalisia, što ja rabiŭ 3 lipienia. Mnie patłumačyli, što moj psychalahičny partret, a taksama niekatoryja dopisy na forumach, jakija ja nibyta pišu, śviedčać pra toje, što ja mahu mieć dačynieńnie da hetaha vybuchu ci navat być hetym vykanaŭcam. Maŭlaŭ, moj psychalahičny partret supadaje z psychalahičnym partretam hetaha vykanaŭcy».
Siarhiej Bałykin nazvaŭ dziejańni pradstaŭnikoŭ KDB i milicyi niezakonnymi i źbirajecca padać skarhu u prakuraturu. Jon nie vyklučaje, što takija dziejańni źviazanyja z tym, što jon admoviŭsia zdavać adbitki palcaŭ.
Taksama jon nie vyklučaje, što «heta było sprobaj zapałochvańnia».
«Ja nie biaru ŭdzieł u vybarčaj kampanii, ja dystancyjanavaŭsia ad usich kandydataŭ. Ja nia vieru ŭ hetyja vybary, ale, mahčyma, padstavaj dla hetaha stali maje krytyčnyja artykuły pra biełaruskuju ekanomiku, maje vystupy ŭ rasiejskich medyjach, Jany cikavilisia, čamu ja supracoŭničaju ź „Biełsatam“, daju im niejkija kamentary».
Siarhiej Bałykin padpisaŭ pratakoł, u jaki pa jaho słovach, uvajšła «tolki nievialikaja kolkaść dadzienych tłumačeńniaŭ, jakaja tyčyłasia taho, što ja nia viedaju i nia maju nijakich źviestak nakont taho, chto moh zrabić hety vybuch i dačynieńnia da hetaha vybuchu nia maju. U hety čas ja znachodziŭsia ŭ Paryžy i ŭ Strasbury».
