Vyhladaje na toje, što Viktar Ciareščanka vystupaŭ u zapisie, a nie ŭ žyvym efiry. Zału jon nijak nie ŭpryhožvaŭ. Sam hladzieŭ ubok kamiery, niby razmaŭlaŭ z kimści ŭ studyi.
Hladziełasia toje niakiepska. Havaryŭ jon spakojna, jasna.
Na pieršy pohlad, jaho vystup najpierš byŭ adrasavany ludziam starejšaha pakaleńnia, što jašče nastalhujuć pa vialikaj dziaržavie. Šmat u čym jahonyja prapanovy hruntavalisia na hołym papuliźmie, ale vyhlad jon rabiŭ prystojny.
Najpierš Ciareščanka zaznačyŭ, što «žorstkaje ručnoje kiravańnie ŭ krainie absalutna vyčarpała siabie». A jak paćvierdžańnie pačaŭ pieraličvać rost cenaŭ na chleb i bulbu.
«Kali pierad vybarami rastuć piensii i zarobki, to čakaj pavieličeńnia cenaŭ», — skazaŭ kandydat. «My ŭsie ŭmiejem pracavać. Ale pracavać i zarablać roznyja rečy».
Ciareščanka šmat aburaŭsia tym, što my skuplajem i zachoŭvajem dalary, a nie rubli, a takim čynam pracujem na zamiežnuju ekanomiku. U druhoj častcy pramovy jon paabiacaŭ mocnuju nacyjanalnuju valutu.
«Treba źmiena hrašovaj palityki. My zrobim rubiel svabodna kanviertavanym. Kurs budzie try rubli da adnaho dalara, a ciaham dvuch hadoŭ zrobim adzin da adnaho», — takoje było abiacańnie.
Ciareščanka na hrafikach pakazaŭ rost zamiežnaha doŭhu biełarusaŭ, zatratnaść ajčynnych pradpryjemstvaŭ (pakazaŭ na paraŭnańni ź Japonijaj). Što datyčyć vialikich padatkaŭ, to tut paraŭnoŭvaŭ užo z ZŠA. Naturalna, što prykłady byli nie na karyści Biełarusi.
«U nas płaciać 20% PDV, a ŭ inšych krainach płaciać z prybytku. My ž pradajom biez prybytkaŭ», — skazaŭ Ciareščanka.
Vystupoŭca nazvaŭ krytyčnym znos mašyn na pradpryjemstvach. Nie daspadoby jamu sudovaja sistema. Kali luboha dyrektara mohuć pasadzić.
Paśla ŭmacavańnia rubla buduć raści piensii i zarobki. Akcyi pradpryjemstvaŭ paabiacaŭ pradavać samim rabočym.
Ciareščanka adzin ź niamnohich kandydataŭ, chto zakranuŭ prablemu siała. Paabiacaŭ, što zarobki ŭ vioscy buduć nie mienšyja, čym u horadzie.
Jašče było ahučanaje zamacavańnie siabroŭskich i bratnich stasunkaŭ z Rasijaj «siońnia, zaŭtra i naviečna». Svaju prahramu jon taksama paabiacaŭ Łukašenku, kali toj stanie prezidentam.
