Umovy lhotnaha zaličeńnia ŭ VNU buduć pierahledžanyja

Umovy lhotnaha zaličeńnia ŭ VNU Biełarusi płanujecca pierahledzieć. Ab hetym paviedamiŭ 25 listapada na pasiadžeńni kalehii Minadukacyi ŭ Minsku pieršy namieśnik ministra adukacyi Alaksandr Žuk.

Pavodle jaho słoŭ, budzie stvorana mižviedamasnaja kamisija pa vyvučeńni abhruntavanaści i metazhodnaści davańnia lhot roznym hrupam abituryjentaŭ.

Kamisija «pavinna vyjści na kankretnyja prapanovy pa ŭparadkavańni lhot».

Jak zajaviŭ pieršy namieśnik ministra, u chodzie ŭstupnaj kampanii 2010 hoda ŭmovy pazakonkursnaha zaličeńnia abituryjentaŭ-ilhotnikaŭ na asobnyja prestyžnyja śpiecyjalnaści nie pakidali šancaŭ na ŭdzieł u konkursie abituryjentam sa značna bolš vysokimi bałami.

Naprykład, u BDU na śpiecyjalnaść «palitałohija» na biudžetnuju formu navučańnia pry prachadnym bale 348 pa-za konkursam byli zaličanyja lhotniki, jakija nabrali ŭsiaho 118 bałaŭ (amal u try razy mienš). Pry hetym ilhotniki zaniali kala 40% biudžetnych miescaŭ i vycisnuli abituryjentaŭ, jakija nabrali na 200 bałaŭ bolš, adznačyŭ Žuk. Pavodle jaho słoŭ, na śpiecyjalnaść «biźnies-administravańnie» na biudžetnuju formu pry prachadnym bale bolš čym 336 pa-za konkursam byŭ zaličany abituryjent, jaki nabraŭ 109 bałaŭ, ale nie prajšli pa konkursie asoby, jakija nabrali bolš čym 300 bałaŭ. Padobnyja vypadki byli i ŭ Minskim dziaržaŭnym linhvistyčnym univiersitecie, Biełaruskim dziaržaŭnym piedahahičnym univiersitecie imia Maksima Tanka i inšych VNU.

Žuk adznačyŭ, što

ŭviedzienyja raniej peŭnyja normy pa abmiežavańni lhot pry zaličeńni na papularnyja śpiecyjalnaści na praktycy da kanca nie pracujuć.

«Sprava ŭ tym, što hetaja norma raspaŭsiudžvajecca na tyja śpiecyjalnaści, na jakija konkurs byŭ u papiarednija hady piać i bolš čałaviek na miesca. Na praktycy abituryjenty adsočvajuć infarmacyju i nie padajuć dakumienty na padobnyja śpiecyjalnaści», — skazaŭ pieršy namieśnik ministra. U šerahu vypadkaŭ padobnaja situacyja składvajecca i pry praviadzieńni raździelnaha konkursu pamiž sielskimi i haradskimi vypusknikami.

«Tamu nieabchodna ŭsiebakova praanalizavać ilhoty, što dajucca abituryjentam pry pastupleńni, pahladzieć ich apraŭdanaść i paradak prymianieńnia», — zaklučyŭ Žuk.

0

0

0

0

0

0

Anastasija Janušeŭskaja, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH