Biełarusy stali čaściej skardzicca na niajakasnyja miedyčnyja pasłuhi. Pryčym narakajuć nie tolki na dziaržaŭnyja, ale i na pryvatnyja arhanizacyi. Jurystka Tavarystva abarony spažyŭcoŭ Kaciaryna Arłoŭskaja adznačaje: «U miedycynie źjaviłasia jaskravaja alternatyva. Siońnia spažyviec moža paraŭnać pasłuhi, vyznačyć ich jakaść. Razam z hetym, da biełaruskaha spažyŭca pryjšło razumieńnie, što za svaje pravy, jakija parušaje miedpiersanał, treba zmahacca. Siońnia stvoranaja takaja sistema, što na kožnaha doktara pacyjent moža paskardzicca ŭ ministerstva, adździeły achovy zdaroŭja i ŭ tavarystva abarony spažyŭcoŭ.
Biełarusy stali bolš canić nie tolki svajo zdaroŭje, ale i hrošy, jakija vydatkoŭvajuć na jaho.Mienavita tamu na siońnia bolš sudovych pozvaŭ u dačynieńni pryvatnych centraŭ, dzie pasłuhi bolš darahija».
Pryvatnyja kampanii šmat skarhaŭ śpisvajuć na «spažyviecki ekstremizm».
«Bahata ludziej, jakija prosta chočuć lačycca biaspłatna, tamu jany čaplajucca da drobiaziaŭ i patrabujuć viarnuć im hrošy. Ale dakazać, što miedyčnaja pasłuha była akazana niajakasna, dosyć składana.Tamu my nastojvajem na ekśpiertyzie. I tady časta vyśviatlajecca, što klijent prosta chacieŭ na chalavu atrymać lačeńnie», — paviedamili ŭ adnym z pryvatnych miedyčnych centraŭ.
U Tavarystva abarony spažyŭcoŭ stała źviartajucca i sami miedyki, jakija sprabujuć abaranić svaje pravy pierad pacyjentami. Pavodle ekśpiertaŭ, kanflikt pamiž pacyjentami dy miedykami moža paspryjać refarmavańniu strachavoj sistemy miedycyny ŭ Biełarusi, jakaja ciapier nie adpaviadaje patrabavańniam hramadstva. Naprykład, adsutničaje sistema strachavańnia chvoraha padčas apieracyjaŭ.
