Seks-tury ŭ Biełaviežskuju pušču spynienyja 4

Nacyjanalny park «Biełaviežskaja pušča», jaki znachodzicca ŭ padparadkavańni Kiraŭnictva spravami prezidenta, vykarystoŭvaŭsia dla praviadzieńnia seks-turaŭ.

Da takich vysnovaŭ pryjšli biełaruskija pravaachoŭniki ŭ vyniku rasśledavańnia kryminalnaj spravy, raspačataj u dačynieńni da minskaha suteniora.

Jak stała viadoma internet-haziecie Naviny.by, Hałoŭnym śledčym upraŭleńniem papiaredniaha rasśledavańnia MUS da kryminalnaj adkaznaści pryciahvajecca 27-hadovy žychar stalicy. Suprać jaho zaviedzienaja kryminalnaja sprava pa č. 2 art. 171 KK RB («Vykarystańnie zaniatkaŭ prastytucyjaj abo stvareńnie ŭmovaŭ dla zaniatkaŭ prastytucyjaj»).

Mužčynu inkryminujecca arhanizacyja na terytoryi Nacyjanalnaha parku «Biełaviežskaja pušča» seks-turaŭ dla hramadzian Rasii.

Pakul havorka idzie ab intymnych pasłuhach, akazanych u pieryjad sa śniežnia 2008 da listapada 2009. Sutenior «apiakaŭ» amal dva dziasiatki biełaruskich prastytutak.

Park vałodaje čatyrma kamfartabielnymi hatelami z saŭnami i inšymi miescami adpačynku. Jak paviedamlajecca na sajcie DPU «Nacyjanalny park «Biełaviežskaja pušča», «usio aformlena ŭ dalikatnych tanach…» Tak što paśla ahladu valjeraŭ z zubrami, ekskursii pa rezidencyi Dzieda Maroza rasijskim turystam było dzie pryjemna prabavić čas.

Za ŭdzieł u «apahańvańni» honaru Biełarusi arhanizataru seks-turaŭ pahražaje pakarańnie ŭ vyhladzie pazbaŭleńnia voli na termin ad siami da dziesiaci hadoŭ z kanfiskacyjaj majomaści.

U pravaachoŭnikaŭ jość usie padstavy mierkavać, što sutenior dziejničaŭ nie adzin. Ale hłyboka kapać u takich intymnych spravach — sabie daražej.

Nahadajem, što 30 žniŭnia na bazie palaŭničaj haspadarki «Lachavičy» Alaksandr Łukašenka pravioŭ ekstrannuju naradu «pa pytańniach vykanańnia pravaachoŭnymi orhanami zakonnaści pry zabiaśpiečańni kantrolu za finansava-haspadarčaj dziejnaściu Nacyjanalnaha parku «Prypiacki». Padstavaj dla razhladu na takim vysokim uzroŭni staŭ kanflikt pamiž milicyjantami i čynoŭnikami ad pryrody.

Homielskija apieratyŭniki sa słužby pa supraćdziejańni handlu ludźmi «raspracoŭvali» adnaho aktyŭnaha suteniora, dziaŭčaty jakoha karystalisia popytam u naviedvalnikaŭ hetaha nacparku, i vyśvietlili, što i ŭ spravach palaŭničych na terytoryi haspadarki nie ŭsio dobra. U pryvatnaści, havorka išła ab mahčymym bieskantrolnym adstrele dzikoŭ.

Padčas praviadzieńnia apieratyŭna-vyšukovych mierapryjemstvaŭ milicyjanty sarvali niekalki vyhadnych dla palaŭničaj haspadarki ŭhodaŭ. Rabotniki nacyjanalnaha parku napisali kalektyŭnuju «skarhu na dziejańni asobnych supracoŭnikaŭ pravaachoŭnych orhanaŭ».

Na toj ekstranaj naradzie Alaksandr Łukašenka, mimachodź zhadaŭšy ščadralubnych palaŭničych («Užo z kim im mieć znosiny, heta ich sprava. My tut nie prakantralujem nikoha i nie prymusim nikoha»), daručyŭ Hienprakuratury dać «pravavuju acenku dziejańniaŭ bakoŭ».

Prakuratura kanfiskavała ŭ MUS usie apieratyŭnyja materyjały pa hetaj palaŭničaj historyi ź dziaŭčatami, u tym liku i stenahramy telefonnych «prasłuchovak», ale da jakich vysnovaŭ pryjšli praviaralniki i što dałažyli prezidentu, nieviadoma. Pa čutkach, vyniki prakurorskaj pravierki paznačanyja ci to hryfam DSP, ci to «sakretna». Adnak, nakolki viadoma, rezkich «kadravych rašeńniaŭ» z boku kiraŭnika dziaržavy nie było…

naviny.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH