Biełaruś i Ukraina padpisali damovu na transpartavańnie venesuelskaj nafty praz terytoryju Ŭkrainy na biełaruskija NPZ praz naftapravod«Adesa-Brody» .
«Damova padpisana ŭ Miensku, na raniej ahavoranych umovach», — paviedamiŭ Interfaksu načalnik upraŭleńnia źniešnieekanamičnaj dziejnaści kampanii «Ukrtransnafta» Michaił Kraŭčanka.
Jon adznačyŭ, što 25 kastryčnika ŭ Miensku pradstaŭniki Minpałenierha Ŭkrainy i kampanii «Ukrtransnafta» praviali pieramovy z kiraŭnictvam «Biełaruskaj naftavaj kampanii». BNK — kantraktatrymalnik venesuelskaj nafty, upaŭnavažany na padpisańnie damovy ź biełaruskaha boku.
Pa vynikach pieramoŭ baki padpisali adpaviedny dakument.
Pavodle raniejšych źviestak, prajekt damovy praduhledžvaje transpartavańnie praz Ukrainu ŭ Biełaruś kala 5 miljonaŭ ton venesuelskaj nafty. Miarkujecca, što, zhodna z kantraktam, nafta budzie pastaŭlacca tankierami ŭ port Paŭdniovy na svopavych umovach i dalej transpartavacca praz trubapravod
Pa vynikach pieramoŭ prezydentaŭ Biełarusi i Venesueły Alaksandra Łukašenki i Uha Čavesa, jakija prajšli 16 kastryčnika ŭ Miensku, «Biełaruskaja naftavaja kampanija» i PDVSA padpisali kantrakt na pastaŭku ŭ 2011–2013 hadach u Biełaruś 10 miljonaŭ ton nafty ŭ hod.
