Staršynia Centrvybarkama Lidzija Jarmošyna nie vyklučaje, što paśla zaviaršeńnia karjery ŭ jakaści kiraŭnika Centrvybarkama budzie bałatavacca ŭ deputaty parłamienta. Pra heta jana zajaviła, adkazvajučy na pytańni čytačoŭ štotydniovika «Arhumienty i fakty».
Praŭda, pry hetym kiraŭnik CVK adznačyła, što pakul vybarčyja kampanii jaje cikaviać tolki z punktu hledžańnia ich arhanizacyi.
«Sprava ŭ tym, što ŭdzieł u vybarach praduhledžvaje nie tolki viedańnie naboru technałahičnych apieracyj.
Heta stan dušy i hatoŭnaść zmahacca za peŭny post.Akramia taho, treba być avanturnym, nie mieć kompleksaŭ i strachaŭ. Heta albo jość, albo niama. Ja — čałaviek, pazbaŭleny ryzyki ŭ pryncypie, tamu nikoli nie hulaju ni ŭ jakija hulni. Prosta niecikava. Nie razumieju, jak, naprykład, možna pieražyvać na skačkach abo padčas łatarei. Ale skazać, što nikoli nie budu hetaha rabić, taksama nie mahu.
Chto jaho viedaje, moža, na piensii vaźmu i pajdu ŭ deputaty. Usio moža być»,— skazała Lidzija Jarmošyna.
Varta adznačyć, što pa ŭzroście (a Lidzija Jarmošyna naradziłasia 29 studzienia 1953) kiraŭnik CVK Biełarusi ŭžo daŭno źjaŭlajecca piensijanierkaj. Ale zakon dazvalaje dziaržsłužboŭcam praciahvać pracoŭnuju dziejnaść da 65 hadoŭ.
Ciapierašnija prezidenckija vybary stanuć užo10-j vybarčaj kampanijaj, jakuju Lidzija Jarmošyna pravodzić u jakaści kiraŭnika CVK. Vyniki nivodnaj ź ich nie byli pryznanyja mižnarodnaj supolnaściu.
Jarmošyna taksama zastajecca ŭ śpisie asobaŭ, jakim zabaronieny ŭjezd na terytoryju krain — siabraŭ Jeŭrapiejskaha sajuza, jak adna z arhanizataraŭ falsifikacyj narodnaha volevyjaŭleńnia.
