Z 29 pa 31 kastryčnika ŭ Minsku projdzie akcyja «Ściana», skiravanaja na pryciahnieńnie hramadskaj uvahi da prablemy hvałtu ŭ siamji. Inicyjataram prajekta vystupiła hrupa studentaŭ.
Jak paviedamiła adna z arhanizataraŭ akcyi Lilija Niekraševič, miescam jaje praviadzieńnia abrany hipiermarkiet «Hipa» pa vulicy Rakasoŭskaha — tut siońnia ŭstanoviać ścianu, na jakoj adnym radkom buduć apisanyja historyi achviar bytavoha nasilla.
Pavodle zadumki arhanizataraŭ, cahlanaja ściana — heta svojeasablivaje ŭvasableńnie strachaŭ: asudžeńnie hramadstva, pomsta muža, adsutnaść viery, jakija pieraškadžajuć paciarpiełym žančynam pačać vyrašać prablemu nasilla ŭ svajoj siamji.
Padčas praviadzieńnia akcyi vałanciory buduć razdavać buklety ź infarmacyjaj pra arhanizacyi, jakija dapamahajuć u vyrašeńni kanfliktnych situacyj u siamji, akazvajuć psichałahičnuju, jurydyčnuju i miedycynskuju dapamohu.
Kulminacyjaj mierapryjemstva i znakam pratestu suprać bytavoha hvałtu ŭ dačynieńni da žančyn
stanie publičnaje razbureńnie ściany 31 kastryčnika ŭ 17.00.
«Raspracoŭvajučy kancepcyju našaha prajekta, my chacieli bolš dastupna raskazać pra mahčymaści abarony, dapamohi i srodkach reabilitacyi, matyvavać paciarpiełych źviartacca pa dapamohu», — rastłumačyła Lilija Niekraševič.
U padtrymku akcyi «Ściana» vystupili Minski haradski centr sacyjalnaha absłuhoŭvańnia siamji i dziaciej, HA «Radzisłava», prahrama «Ła Strada» i inšyja arhanizacyi.
