Biełaruskaja chryścijanskaja demakratyja, «Małady front» i Biełaruskaja sacyjał‑demakratyčnaja partyja «Narodnaja hramada» zajavili ab praviadzieńni 24 listapada vuličnaj akcyi pad nazvaj «Sychodź!».
«Heta klučavaja akcyja. Jana adbudziecca na nastupny dzień paśla rehistracyi, ci nierehistracyi kandydataŭ u prezidenty. A taksama ŭ hadavinu antykanstytucyjnaha refierendumu 1996 hoda. Akcyja budzie mieć nazvu «Sychodź!». Heta taksama budzie pratest suprać złoŭžyvańniaŭ na vybarach, jakija rychtujucca zaraz», — adznačyŭ sustaršynia BCHD Pavieł Sieviaryniec.
Staršynia BSDP «NH» Mikałaj Statkievič zaznačaje, što vybary projduć u niezvyčajnych umovach. «Jość ustojlivaja niepryjaź da Łukašenki. Razam z tym, apazicyja nie zmahła damovicca ab adzinym kandydacie», — kaža M.Statkievič. Tym nie mienš, jon spadziajecca, što ŭdasca vyjści na adzinaha ŭžo paśla etapu zboru podpisaŭ, kab «adzinaha nie abraŭ Łukašenka».
Kiraŭnik MF Źmicier Daškievič kaža, što aktyvisty jahonaj arhanizacyi buduć zaklikać ludziej na Płošču.
Padtrymaŭ jaho i kandydat u prezidenty ad BCHD Vital Rymašeŭski, jaki zaznačyŭ, što niaźmienny nakirunak — Płošča.
Što datyčyć pieramovaŭ ab vyłučeńni adzinaha, to Rymašeŭski kaža, što paŭnamoctvaŭ ab viadzieńni pieramovaŭ ź inšymi kandydatami ŭ jaho niama. «Pakul u prahramie Niaklajeva jość punkt pra intehracyju z Rasijaj, pieramovy ź im niemahčymyja», — zaznačyŭ sustaršynia BCHD.
Dakumienty na rehistracyju inicyjatyŭnaj hrupy Vital Rymašeŭski pojdzie padavać u piatnicu. Kiraŭnikom hrupy budzie Pavieł Sieviaryniec.
