Ludzi ŭstanaŭlivajuć doma i na pracy akvaryumy. Tolki dla pryhažości? Pavinna ž być ad ich choć niejkaja praktyčnaja karyść... I jana jość, biezumoŭna!
A praŭda, cikava zazirnuć choć adnym vokam u padvodny śviet ź jaho nasielnikami, dziŭnymi raślinami, niezrazumiełymi zakonami? Heta pavolnaje płaŭnaje žyćcio zahadkavaje, pryhožaje i całkam zavarožvaje. A hałoŭnaje — kab dałučycca da jaho, nie abaviazkova jechać na ciopłyja mory i asvojvać techniku dajvinha. Hety čaroŭny śviet možna stvaryć samastojna, nasialić, kim zachočacca, i kolki zaŭhodna potym lubavacca.
Karysna
U naš čas lačeńnie rybkami — suśvietnaja psichałahičnaja praktyka. Čałaviek, jaki lubujecca płaŭnym niaśpiešnym žyćciom usiaredzinie akvaryuma, nabyvaje spakoj i adčuvańnie dušeŭnaj raŭnavahi, adciahvajecca ad tryvožnych dumak. Tamu śpiecyjalisty rekamiendujuć zavodzić akvaryumy ludziam ź niaŭstojlivaj psichikaj abo jak instrumient baraćby sa stresam. Taksama vyznačana, što nazirańnie za nasielnikami akvaryuma na praciahu 10—15 chvilin sadziejničaje narmalizacyi kryvianoha cisku, jaki pavysiŭsia ŭ vyniku niervovaha napružańnia abo intensiŭnaj razumovaj dziejnaści.
Biaśpiečna. Isnuje chodkaje mierkavańnie, što na rybak moža ŭźnikać alerhija. Paćviardžeńniaŭ hetamu niama. Ale voś suchi korm sapraŭdy źjaŭlajecca mocnym alerhienam. U hetym vypadku možna razhledzieć jak varyjant inšyja vidy karmoŭ. U astatnim ža akvaryumnyja rybki — samyja biaskryŭdnyja z chatnich hadavancaŭ.
Pavažna
I doma, i ŭ rabočym kabiniecie dziełavoha čałavieka akvaryum nie tolki ŭpryhožvaje pamiaškańnie, ale i padkreślivaje indyvidualnaść jaho ŭładalnika. Pryhožy vialiki akvaryum nie tolki elemient dyzajnu. Jon, akramia inšaha, śviedčyć pra toje, što kłopat pra žyvych istot nie čužy haspadaru.
Piedahahična
Vychavaŭča-adukacyjnyja funkcyi chatniaha akvaryuma vidavočnyja. Dohlad jaho nasielnikaŭ i raślin patrabuje strohaj dyscypliny i akuratnaści. Akramia taho, dla dziaciej heta — nahladny dapamožnik pa bijałohii i zaałohii.
Utulna. Sanitarna-hihijeničnyja patrabavańni havorać pra toje, što aptymalnaja vilhotnaść u žyłym pamiaškańni pry tempieratury pavietra 18—20 S pavinna składać 40—60 %. Ale zimoj pry ŭklučanym aciapleńni jana, biezumoŭna, značna nižejšaja. Radykalna spraŭlajucca z prablemaj uvilhatnialniki pavietra, ale niekatoryja ličać, što vialiki akvaryum u pamiaškańni — heta taksama krynica vilhotnaści pavietra.
Nie stratna
Nie pra materyjalnyja straty havorka. Jakraz na padtrymańnie i "raźvićcio" akvaryuma patracicca daviadziecca. My havorym pra straty emacyjnyja. Tut nie patrabujucca i nie padrazumiavajucca stasunki. Rybkam nie treba zazirać u vočy i ŭhadvać, što ŭ kožnuju asobnuju chvilinu aznačaje źmianieńnie ich pavodzinaŭ; pra što śviedčyć ruch chvościka; nie treba macać nosik — jon u ich pa vyznačeńni chałodny i mokry, a dakranacca da jaho nie rekamiendujecca ŭvohule. Ryby žyvuć u svaim asobnym śviecie, pryznačanym dla ŭpryhožvańnia našaha žyćcia. Jany nie patrabujuć aktyŭnaha ŭdziełu ludziej u ich žyćci. Heta impanuje tym, chto cenić spakoj i niezaležnaść.
