U ambasadzie Biełarusi ŭ Rasiei nazvali vykryvalny siužet na telekanale NTV «złačynnym».
«Skandalnyja siužety» suprać Alaksandra Łukašenki, jakija prajšli pa rasiejskich telekanałach, psujuć rasijska‑biełaruskija stasunki. Pra heta ŭ efiry radyjostancyi «Echo Moskvy» zajaviŭ pres‑sakratar ambasady Biełarusi ŭ Rasiei Vital Śliŭka.
«Vyłučać bluźnierskija abvinavačvańni ŭ adras kiraŭnika dziaržavy niedapuščalna i złačynna. Heta domysły, jakija nie majuć pad saboj hleby, i nabor kamientaraŭ, jakija z kantekstu vykinuli», — skazaŭ Śliŭka.
«Asabliva sumna, što jany (siužety) źjavilisia napiaredadni sustrečy ŭ Astanie, jakaja prachodzić siońnia i na jakoj płanujecca padpisańnie šerahu dakumientaŭ, źviazanych z mytnym sajuzam», — padkreśliŭ pres‑sakratar.
«Ja nie dumaju, što heta budzie spryjać umacavańniu siabroŭstva i parazumieńnia, i spadziajusia, što hetyja siužety nie źjaŭlajucca aficyjnym vyražeńniem palityki rasiejskaha kiraŭnictva», — dadaŭ jon.
Nahadajem, što ŭčora rasiejski telekanał NTV raspavioŭ praŭdu pra palityčnyja źniknieńni i zabojstvy apazicyjanieraŭ u Biełarusi.
U prahramie «Nadzvyčajnaje zdareńnie» na telekanale NTV byŭ pakazany film «Chrosny baćka», u jakim było raskazana pra zahadkavuju śmierć vice‑śpikiera Viarchoŭnaha Savieta Biełarusi Hienadzia Karpienki, vykradańni i zabojstvy byłoha ministra ŭnutranych spravaŭ Juryja Zacharanki, vice‑śpikiera Viarchoŭnaha Savieta, byłoha kiraŭnika Centravybarkamu Viktara Hančara, žurnalista Dźmitryja Zavadskaha, biznesmena i hramadskaha dziejača Anatola Krasoŭskaha. U filmie pryvodziacca archiŭnyja intervju z vykradzienymi apazicyjanierami i ich svajakami, i naŭprost kažacca pra datyčnaść biełaruskich uładaŭ da źniščeńnia palityčnych apanientaŭ.
