U niadzielu ŭviečary mnie patelefanavaŭ znajomy i skazaŭ, kab ja terminova ŭklučyŭ kanał NTV — tam budzie žurnalisckaje rasśledavańnie. I pakłaŭ trubku. Adrazu zhadałasia atmaśfiera siaredziny 80‑ch. — Ty čytaŭ siońnia hazietu «Pravda»? — Nie, a što tam? — Heta nie telefonnaja razmova. Jak i tady, ciapier usie adzin adnaho razumiejuć z paŭsłova.
Kali na NTV idzie niejkaje «žurnalisckaje rasśledavańnie», cikavaje dla biełaruskich hledačoŭ — značyć, heta toj film, jaki entevešniki pryjazdžali zdymać u Biełaruś pryblizna hod tamu i byli departavany ŭładami. Užo tady było viadoma, što rasijskaja telekampanija zdymaje film z metaj kampramietacyi Alaksandra Łukašenki…
U mianie, adrozna ad majho znajomaha, niama NTV+. A hladzieć NTV‑Biełaruś, zrazumieła, nie było sensu. (U toj viečar na hetym kanale pakazvali niejkija «Siamiejnyja sakrety» ci niešta takoha kštałtu). Vyrašyŭ troški pačakać — kali sapraŭdy ŭ efir vyjdzie niešta vartaje ŭvahi, abaviazkova adhukniecca internet. I sapraŭdy, u toj samy viečar zmoh pahladzieć frahmient filma entevešnikaŭ «Chrosny baćka», vykładzieny na You Tube.
T
reba pryznacca, u pieršyja niekalki chvilin ubačanaje ahałomšvała. Nie źmiestam. Fakty, pryviedzienyja ŭ filmie, daŭno viadomyja ŭ Biełarusi. I nie tolki apazicyi, ale, badaj, bolšaści tych, chto karystajecca internetam. Urazili sam ton i maniera padačy materyjału.Heta nijakaje nie žurnalisckaje rasśledavańnie — heta prysud. Prytym, kančatkovy, jaki abskardžvańniu nie padlahaje. Takim tonam zvyčajna na NTV apaviadajuć pra złačyncaŭ u rubrycy «Nadzvyčajnaje zdareńnie». (U hetaj rubrycy film i vyjšaŭ).
I ŭ hetym fakcie, tak by mović, advarotny bok miedala. NTV, jaki ŭ 90‑ia byŭ adnym ź lepšych niezaležnych telekanałaŭ, pry Pucinu pieratvaryłasia ŭ tak zvanaje treš‑telebačańnie. Jość navat taki žart: pahladzieŭ NTV — pieraklučy za saboj. Viadoma, što Uładzimiru Pucinu hetaje telebačańnie ŭ jaho ciapierašnim abliččy vielmi padabajecca. Heta adziny telekanał, redakcyju jon, jašče budučy prezidentam, asabista naviedaŭ. A niekatoryja žurnalisty NTV majuć dziaržaŭnyja ŭznaharody.
Zrazumieła, zakaznyja prahramy robiać i na dziaržaŭnych rasijskich kanałach. Čaho vartyja naprykład, siužety Arkadzija Mamantava na kanale «Rośsija». Ale ž, kali b toj samy «Chrosny baćka» vyjšaŭ by, skažam, na RTR, rezanans byŭ by inšy. A tak nivodzin rasijski sajt nie adhuknuŭsia na siensacyjny film — prynamsi, adrazu paśla jaho vychadu.
Reputacyja ŭ NTV nie samaja lepšaja. Dakładniej, mienavita takaja, jakaja dazvalaje pakazvać padobnyja siužety ŭ efiry biez asabliva ciažkich nastupstvaŭ. Maŭlaŭ, pryvatny telekanał — što choča, to i pakazvaje. Svaboda ž lepiej, čym niesvaboda.
A z druhoha boku, fakt vychadu vykryvalnaha filma na NTV abiasceńvaje ŭsie pryviedzienyja ŭ im fakty i arhumienty ŭ dziasiatki, kali nie ŭ sotni razoŭ. Robić jaho čarhovaj tannaj siensacyjaj, miesca jakoj paśla prahladu — u košyku dla śmiećcia.
Mahčyma, zadumvaŭsia mocny prapahandyscki streł. Ale streł byŭ jaŭna chałasty. Praŭda, časam i chałastymi patronami stralajuć. Kab napałochać praciŭnika.
