Sučasnyja kasiniery šanujuć pamiać prodkaŭ.
28 červienia, u 350‑iu hadavinu bitvy pad Pałonkaj, na jaje miescy prajšła śviatočnaja impreza.
Spačatku ŭdzielniki prybrali terytoryju ad śmiećcia i skasili travu la pamiatnaha kamienia‑vałuna. Zatym krajaznaŭcy Viktar Syryca i Michaś Biernat raskazali pra historyju bitvy, baranavickija paety Aleś Kornieŭ, Janka Zbažyna i Ivan Łahinovič pračytali vieršy, pryśviečanyja našym vajaram. Vialikaje ŭražańnie na prysutnych zrabiŭ vystup rycarskaha kłubu «Šlachieckaja zastava».
Na zakančeńni mierapryjemstva patryjatyčnyja pieśni śpiavali Halina Jaraševič i Aleś Hrycaviec, a saksafanist Valer Šyła padaravaŭ prysutnym čaroŭnyja huki pałaneza «Raźvitańnie z radzimaj» Michała Kleafasa Ahinskaha.
Baranavickaja hramadskaść niekalki razoŭ ustaloŭvała na miescy bitvy pamiatny znak. Rajonnaje kiraŭnictva padymała lamant. Maŭlaŭ, pryviedziacie da taho, što Rasieja admovicca pastaŭlać Biełarusi naftu i haz. Pomnik, aśviečany carkvoju i kaściołam, rujnavali ŭnačy «nieviadomyja».
U carski i saviecki čas kateharyčna zabaraniałasia havaryć i pisać pra pieramohi nad maskoŭskim carom. Siońnia, dziakuj Bohu, naša dziaržava pazbaŭlajecca plebiejstva i kompleksaŭ «małodšaha brata» nie tolki ŭ sacyjalna‑ekanamičnaj, palityčnaj śfierach, ale i ŭ adznakach svaich histaryčnych padziej.
