Respublikanskaja hazieta «Naš sport» 1 lipienia spyniła svajo isnavańnie. Hety srodak masavaj infarmacyi vypuskała mahiloŭskaje vydaviectva «Nika». Hazieta nie dažyła miesiac da svajho šaścihodździa.
Vydańnie źjaviłasia ŭ žniŭni 2004 hoda, niezadoŭha da startu letnich Alimpijskich hulniaŭ u Afinach. «Naš sport», jaki mieŭ trochtysiačny nakład i raspaŭsiudžvaŭsia pa ŭsioj terytoryi Biełarusi, pisaŭ pra padziei ŭ ajčynnym i suśvietnym sporcie. Profilnymi temami haziety byli hulniovyja vidy sportu: futboł, handboł, chakiej. Za šeść hadoŭ śviet pabačyła 308 numaroŭ haziety.
«Naš sport» vychodziŭ raz na tydzień pa sieradach na 32 pałosach.
«Asnoŭnaja pryčyna zakryćcia haziety ekanamičnaja, — zajaviła BiełaPAN zasnavalnik vydaviectva Ina Hoharava. — Nam stała niavyhadna vypuskać «Naš sport». Kaniešnie, ad vypusku haziety my atrymlivali prybytak, ale jon byŭ u razy mienšy za čakany. My sprabavali pradać »Naš sport», ale dastojnych prapanoŭ, na žal, atrymać nie zmahli. Vydaviectva »Nika» praciahnie vypusk haziety «Čietvierh», jakaja, jak i »Naš sport», prychodzić da čytačoŭ pa sieradach».
Raniej z ekanamičnych pryčyn zakrylisia haziety «Sport‑kuŕjer» i «Sovietskij sport v Biełoruśsii».
