Zapłanavany na 28 červienia vizit u Minsk rabočaj hrupy «Hazproma» admienieny, paviedamili ŭ pres‑słužbie biełaruskaha ŭrada.
Hienieralny dyrektar AAT «Biełtranshaz» Uładzimir Majoraŭ u kamientaryi dziaržaŭnamu ahienctvu BiełTA rastłumačyŭ, što
nieabchodnaść pryjezdu delehacyi «Hazproma» ŭ Minsk źnikła — baki »mohuć pracavać dystancyjna».
«Hazprom», pavodle słoŭ Majorava, dasłaŭ u «Biełtranshaz» svaju redakcyju dadatkovaha pahadnieńnia da tranzitnaha kantrakta. »My jaje ŭzhadnili i 27 červienia nakiravali im nazad», — skazaŭ hiendyrektar.
«Dumaju, što my, jak raniej i płanavali, u sieradu‑čaćvier usie nieabchodnyja dakumienty padpišam», — dadaŭ Majoraŭ. Pry hetym jon nie vyklučyŭ, što i dadatkovaje pahadnieńnie moža być zaklučana dystancyjna — «technična heta mahčyma».
U «Hazpromie» kamientavać situacyju z admienaj vizitu delehacyi ŭ Minsk BiełaPAN admovilisia.
Nahadajem, 25 červienia pieršy vice‑premjer Biełarusi Uładzimir Siamaška prainfarmavaŭ prezidenta, što 28—29 červienia rabočaja hrupa »Hazproma» praviadzie pieramovy z kiraŭnictvam »Biełtranshaza», a ŭ sieradu, 30 červienia, u Minsk pavinien prybyć namieśnik staršyni praŭleńnia hazavaha chołdynhu Valeryj Hołubieŭ. «My ź im padpišam dakumient, u jakim budzie zafiksavana pryznańnie daŭhoŭ i terminy, kali jany hetyja hrošy viernuć», — skazaŭ Siamaška.
Pavodle słoŭ pieršaha vice‑premjera, u telefonnaj razmovie ź im i Valeryj Hołubieŭ, i kiraŭnik praŭleńnia «Hazproma» Alaksiej Miler «pryznali, što jany niedapłacili». «U mianie jość usie padstavy, dakumientalna paćvierdžanyja, što ja pavinien u ich zapatrabavać jašče 32 miljony dalaraŭ da 260 miljonaŭ. Jany paćviardžajuć, što tak, jość pytańni», — adznačyŭ Siamaška.
23 červienia »Hazprom» atrymaŭ ad Biełarusi 187 młn. dalaraŭ doŭhu za pastaŭleny ŭ 2010 hodzie haz i ŭ poŭnym abjomie adnaviŭ hazavyja pastaŭki.
U svaju čarhu «Hazprom» pieraličyŭ Minsku 228 młn. dalaraŭ za tranzit hazu, ale Minsk patrabuje 260 młn. Raźbiežka ŭźnikła z‑za roznaj acenki staŭki tranzitu: biełaruski bok havoryć pra 1,88 dalara za tysiaču kubamietraŭ hazu na 100 km, rasijski — pra 1,45 dalara.