Pajšoŭ z žyćcia pieršy prezident niezaležnaj Litvy, eks-premjer, były pieršy sakratar Centralnaha kamiteta Kamunistyčnaj partyi Litvy Alhirdas-Mikołas Brazaŭskas. Z 2008 hoda Brazaŭskas zmahaŭsia ź limfahranułamatozam. Jamu było 77 hadoŭ.
Hod tamu eks-prezident pakutavaŭ ad raka prastaty, adnak paśla šmatlikich sieansaŭ pramianiovaj terapii chvarobu ŭdałosia pieramahčy.
Brazaŭskas naradziŭsia 22 vieraśnia 1932 h. u siamji słužboŭcaŭ. Skončyŭ Kaŭnaski politechničny instytut pa śpiecyjalnaści inžynier-hidratechnik, paźniej atrymaŭ stupień doktara ekanamičnych navuk.
Na rubiažy 60-70-ch Brazaŭskas kiravaŭ budaŭnictvam Kaŭnaskaj hidraelektrastancyi. U 1965 h. staŭ ministram pramysłovaści budaŭničych materyjałaŭ Litoŭskaj SSR. U 1987 h. staŭ sakratarom Centralnaha kamiteta Kamunistyčnaj partyi Litvy, adkazvaŭ za enierhietyku.
Kali ŭ Litvie pačaŭsia pieryjad nacyjanalnaha adradžeńnia, u 1988 h. Brazaŭskas byŭ abrany pieršym sakratarom Centralnaha kamiteta Kamunistyčnaj partyi Litvy.
Jaho kandydaturu na hetuju pasadu padtrymaŭ ruch nacyjanalnaha adradžeńnia «Sajudzis».
Praz hod pad kiraŭnictvam Brazaŭskasa Kamunistyčnaja partyja Litvy padtrymała ruch Litvy da niezaležnaści i transfarmavałasia ŭ partyju sacyjał-demakratyčnaha typu – Demakratyčnuju partyju pracy Litvy.
U pačatku 1990 hoda byŭ abrany deputatam Viarchoŭnaha Savieta, padpisaŭ Akt ab niezaležnaści Litvy 11 sakavika 1990 h., u pieršym uradzie Kazimiery Prunskienie zajmaŭ pasadu namieśnika premjer-ministra.
14 lutaha 1993 h. Brazaŭskas byŭ abrany prezidentam Litoŭskaj Respubliki na piacihadovy termin. Za jaho prahałasavała 60% vybarščykaŭ.
U pieryjad prezidenctva Brazaŭskasa Litva pačała šlach u Jeŭrapiejski Sajuz i NATO, u hetyja hady ź Litvy vyvieli Savieckuju armiju.
Vyłučać svaju kandydaturu na druhi termin Brazaŭskas admoviŭsia.
Z zakančeńniem prezidenckich paŭnamoctvaŭ jaho źmianiŭ Vałdas Adamkus, jaki vyjhraŭ vybary ŭ studzieni 1998 hoda. Eks-prezident syšoŭ z palityki, patłumačyŭšy hety krok tym, što jon – były dziejač savieckaha pieryjadu – bolš nie moža dziejničać na palityčnaj arenie niezaležnaj Litvy.
Adnak praź niekalki hadoŭ Brazaŭskas viarnuŭsia ŭ aktyŭnuju palityku.
U 2000 hodzie jon pryniaŭ udzieł u stvareńni kaalicyi levych i centrysckaj partyj. Na parłamienckich vybarach sacyjał-demakratyčny błok Brazaŭskasa atrymaŭ 51 miesca ŭ Siejmie. Uradavuju kaalicyju skłali Sajuz libierałaŭ Litvy i «Novy sajuz». Na abjadnalnym źjeździe ŭ studzieni 2001 h. Demakratyčnaja partyja pracy Litvy i Sacyjał-demakratyčnaja partyja Litvy (SDPŁ) abjadnalisia. Staršyniom novaha abjadnańnia – Sacyjał-demakratyčnaj partyi Litvy byŭ abrany Brazaŭskas.
U lipieni taho ž hoda paśla raspadu pravacentrysckaj kaalicyi i adstaŭki ŭrada Siejm zaćvierdziŭ Brazaŭskasa na pasadu premjer-ministra. Jon zastavaŭsia na pasadzie premjer-ministra da červienia 2006 hoda.
Brazaŭskas, jaki jašče raz pakinuŭ vysokuju pasadu, zachavaŭ svoj upłyŭ u partyi.
Jon byŭ uznaharodžany vyšejšymi ordenami 15 dziaržaŭ, inšymi adroźnieńniami i ŭznaharodami.
