Muzkamiedyja vychodzić ź letarhičnaha snu, u jaki jaho zahnaŭ były mastacki kiraŭnik.
Źjavilisia cikavyja kancertnyja prahramy. 9 červienia Muzyčny teatr pačaŭ doŭhaterminovy kancertny prajekt «Muzyčnyja viečary z Alaksandram Anisimavym». I voś, narešcie, znakavaja padzieja dla teatra — uznaŭleńnie baleta «Miefista» ŭ chareahrafii vydatnaha tancoŭščyka Uładzimira Ivanova na muzyku Uładzimira Kandrusieviča. Jaho pieršaja pastanoŭka na scenie Muzyčnaha teatra adbyłasia ŭ lipieni 2002 hoda. Dla Uładzimira Ivanova heta była dypłomnaja rabota pa zakančeńni baletmajstarskaha adździaleńnia Akademii muzyki, ale ŭ joj jon pakazaŭ siabie stałym, aryhinalnym tvorcam.
Muzyka Kandrusieviča taksama prajšła ekzamien na tvorčuju stałaść. Častkova jana vykarystoŭvałasia ŭ balecie «Miefistofiel» na muzyku Šarla Huno — Uładzimira Kandrusieviča, jaki byŭ pastaŭleny ŭ Nižaharodskaj opiery (Rasija). Dla pastanoŭki ŭ Minsku kampazitar całkam pierarabiŭ muzyku baleta. Mastactvaznaŭca Julija Čurko napisała da jaho novaje libreta. Dyj chareahrafija stvarałasia zusim u inšym styli, tak što atrymaŭsia zusim inšy balet, ciapier užo pad nazvaju «Miefista».
Pośpiech byŭ ahromnisty. Adnak śpiektakl niadoŭha trymaŭsia ŭ repiertuary.
Mastacki kiraŭnik Muzkamiedyi Alaksiej Isajeŭ staŭ zaŭziata zmahacca z baletam.
Jamu nie padabałasia, što baletnaja trupa Muzyčnaha teatra realizuje surjoznyja prajekty — takija, jak «Žyzel», «Šachierazada», «Miefista». Mahčyma, peŭny cisk byŭ z boku kiraŭnika Opiernaha, spadara Jelizarjeva. Bo napačatku 2000‑ch balet Muzkamiedyi stvaraŭ zanadta mocnuju kankurencyju baletnaj trupie Vialikaha teatra, jakaja pieražyvaje nie najlepšy pieryjad.
U vyniku hałoŭny baletmajstar Muzkamiedyi, narodnaja artystka Nina Dziačenka, była zvolnienaja,
u teatry zapanavaŭ duch saviecka‑kałhasnaj muzyčnaj kamiedyi, apafieozam jakoha staŭ «Babski bunt».
Paśla sychodu Isajeva teatr usio jašče bałansuje miž savieckim kitčam i mastactvam, ale pieramoha kitču ŭžo nie vidavočnaja. Choć spustašeńni, pakinutyja raniejšym kiraŭnictvam, u adzin dzień nie załataješ. Teatr apynuŭsia amal u takim samym stanoviščy, jak na pačatku 1990‑ch: biez hrošaj u kišeni, biez hastrolnych kantraktaŭ. Ale tady pryjšła mocnaja kamanda, namahańniami mastackaha kiraŭnika Źmitra Kościna dla kalektyvu nastaŭ sapraŭdny załaty viek. Pravincyjny Teatr muzyčnaj kamiedyi chutka staŭ adnym z najcikaviejšych tvorčych kalektyvaŭ krainy. U im stavilisia opiery, aŭtentyčnyja viersii kłasičnych apieret, cikavyja balety. Jašče krychu — i Muzkamiedyja stała b dla Biełarusi niečym nakštałt Muzyčnaha teatra imia Stanisłaŭskaha i Niemiroviča‑Dančanki ŭ Maskvie. Ale jamu padrezali kryły.
Ciapier pierśpiektyŭnyja tvorcy ŭ teatry taksama jość. Jość cudoŭny arkiestr zusim nie «apieretačnaha» ŭzroŭniu, jaskravyja artysty. Niadaŭna ŭpieršyniu za šmat hadoŭ źjaviŭsia hałoŭny baletmajstar — Źmicier Jakubovič. I heta daje nadzieju, što teatr znoŭ stanie pryvabnym i dla hledačoŭ, i dla teatralnych krytykaŭ.
A pakul 26 i 30 červienia publicy prapanujecca «pieršaja łastaŭka» novaj viasny — balet «Miefista» chareohrafa Uładzimira Ivanova. U hałoŭnych rolach — dypłamanty i łaŭreaty mižnarodnych konkursaŭ Vital Krasnahłazaŭ, Ryhor Krukoŭski i Ryna Ivakiry. Scenahrafija Źmitra Mochava. Za dyryžorskim pultam — Mikałaj Makarevič. I, zrazumieła ž, cudoŭnaja muzyka Uładzimira Kandrusieviča.
