Pavodle samych ścipłych padlikaŭ, ekspazicyja novaha muzieja historyi Vialikaj Ajčynnaj vajny abydziecca ŭ 50 miljardaŭ rubloŭ. Pakul krynica finansavańnia nie vyznačanaja.

U mai 2008 hoda Alaksandr Łukašenka rasparadziŭsia, kab kala steły «Minsk — horad—hieroj» na praśpiekcie Pieramožcaŭ byŭ pabudavany novy, sučasny muziej Vialikaj Ajčynnaj vajny.

Śpiecyjalisty muzieja havorać, što čakajuć ź nieciarpieńniem pierajezdu ŭ novy sučasny budynak. Dziejučy muziej byŭ pabudavany ŭ 1966 hodzie.

— Naš budynak sastareŭ. U im nie było kapitalnaha ramontu 40 hadoŭ, — raspaviała vučony sakratar Halina Babusienka. — Tak što my majem patrebu ŭ novym budynku. Bolš za toje, novaje raźmiaščeńnie muzieja budzie adpaviadać miescu — pobač sa stełaj, na praśpiekcie Pieramožcaŭ. U muziei buduć najlepšyja sučasnyja technałohii — dyzajnierskija, multymiedyjnyja, a hałoŭnaje - tyja, jakija zabiaśpiečvajuć zachavanaść unikalnych muziejnych kalekcyj.

Jak adznačyła surazmoŭnica, u raspracoŭcy prajekta ekśpierty muzieja ciesna supracoŭničajuć z hrupaj architektaraŭ, dyzajnieraŭ i prajektoŭščykaŭ. I kali ź finansavańniem uźviadzieńnia budynka pytańnie adnosna vyrašanaje (heta 108 młrd. rubloŭ u cenach 2006 hoda), to krynicy finansavańnia jaho «načynki» jašče treba vyznačyć.

— U najbližejšy čas Ministerstva kultury abvieścić tender na pošuk padradčyka dla budaŭnictva ekspazicyi, — skazaŭ namieśnik dyrektara muzieja Viačasłaŭ Kazačonak. — Kali mierkavać pa anałahičnym abjektach, samaja ścipłaja suma składzie 50 młrd. rubloŭ.

Budavać sučasny budynak muzieja i ekanomić — nielha.

Pavodle rasparadžeńnia Alaksandra Łukašenki, novy muziej Vialikaj Ajčynnaj vajny pavinien adčynić dźviery ŭ mai 2013 hoda.

— Aryjencir vyznačany, tamu ŭsie pracujem na jaho vykanańnie, — padsumavaŭ surazmoŭca. Ad siabie adznaču, što

ŭvasableńnie takoha hłabalnaha prajekta ŭ žyćcio za try hady, — heta nierealny termin. Bolš za toje, kab jakasna i chutka budavać, nazvanych sum naŭrad ci chopić.

Tamu nie vyklučana, što dadatkovyja hrošy budzie źbirać ŭsia kraina, jak heta było ŭ vypadku z budaŭnictvam Nacyjanalnaj biblijateki.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?