Ź inicyjatyvy Ministerstva ŭnutranych spraŭ pry padtrymcy Ministerstva achovy zdaroŭja i Centralnaha kamiteta BRSM 24 červienia ŭ Biełarusi projdzie akcyja »Skažy, dzie handlujuć śmierciu!».
Jak paviedamiła ŭpraŭleńnie infarmacyi i hramadskich suviaziej MUS, u hety dzień z 8.00 da 18.00 va ŭsich abłasnych centrach buduć pracavać haračyja linii,
na jakija možna paviedamić, u tym liku ananimna, źviestki ab narkahandlarach, miescach raspaŭsiudžvańnia, zachoŭvańnia abo spažyvańnia narkatyčnych i psichatropnych rečyvaŭ. Kanfidencyjnaść paviedamleńniaŭ harantujecca.
Akramia taho, na haračaj linii ŭ Minsku (017) 222‑65‑45 uračy‑narkołahi adkažuć na pytańni, źviazanyja z prablemami ŭžyvańnia narkotykaŭ, parajać, jakija zachady zrabić, kab adoleć narkazaležnaść. Śpiecyjalna dla baćkoŭ płanujecca abmierkavańnie pytańniaŭ, aktualnych u pieryjad letnich kanikuł: jak zaścierahčy padletka ad zaležnaści (narkatyčnaj, nikacinavaj, kampjuternaj i h.d.), jak raspaznać pieršyja prykmiety ŭžyvańnia narkotykaŭ i dzie šukać dapamohi.
Pavodle słoŭ načalnika ŭpraŭleńnia pa narkakantroli i supraćdziejańni handlu ludźmi MUS Alaksandra Haŭryłava, akcyja skiravana na toje, kab zaścierahčy ludziej ad niebiaśpieki być uciahnutymi ŭ narkabiźnies. Siońnia jon źjaŭlajecca adnym z samych prybytkovych u śviecie, tamu žadańnie im zajmacca ŭ peŭnaj častki nasielnictva zastajecca vielmi vialikim.
Za piać miesiacaŭ 2010 hoda ŭ Biełarusi kanfiskavana pryblizna 60 kh narkatyčnych srodkaŭ i pryblizna 30 kh psichatropnych rečyvaŭ.
