AAT papiaredziła Minsk pra mahčymaje abmiežavańnie pastavak hazu z 21 červienia ŭ vypadku niavypłaty doŭhu.
16 červienia «Hazprom» nakiravaŭ listy hienieralnamu dyrektaru AAT «Biełtranshaz» Uładzimiru Majoravu i pieršamu namieśniku premjer-ministra Biełarusi Uładzimiru Siamašku, u jakich papiaredziŭ pra mahčymaje abmiežavańnie pastavak u adpaviednaści z kantraktam, paviedamlaje RIA Novosti sa spasyłkaj na aficyjnaha pradstaŭnika rasijskaha hazavaha chołdynhu Siarhieja Kupryjanava.
Kiraŭnictva «Hazproma» adznačaje, što ŭ 2010 hodzie «Biełtranshaz» sistematyčna parušaje ŭmovy kantrakta ad 31 śniežnia 2006 hoda, i prapanuje pryniać vyčarpalnyja miery pa pahašeńni zapazyčanaści da 21 červienia. U advarotnym vypadku «Hazprom» budzie vymušany skarystać svajo prava ŭvieści abmiežavańni na pastaŭku hazu ŭ adpaviednaści z punktam 6.4 kantrakta, skazaŭ Kupryjanaŭ.
Jon padkreśliŭ, što ŭ kantrakcie niama spasyłak na dynamiku ŭnutranych cen na haz u RF. «U dziejnym kantrakcie niama nijakich spasyłak na tempy i dynamiku źmieny ŭnutranych cen na haz u Rasii, i kali biełaruskija kalehi majuć namier inicyjavać pieramovy pa hetym pytańni, jany mohuć heta zrabić u ramkach adpaviednych mižuradavych instytutaŭ, ale dziejny kantrakt pry hetym pavinny vykonvać u poŭnym abjomie», — zajaviŭ pradstaŭnik «Hazproma».
15 červienia na sustrečy ŭ Horkach z kiraŭnikom AAT «Hazprom» Alaksiejem Mileram prezident Rasii Dźmitryj Miadźviedzieŭ zajaviŭ,
što Minsku dajecca piać dzion, kab vyznačycca z vypłataj doŭhu za rasijski haz.
«U adpaviednaści z umovami kantrakta ŭ nas jość usie padstavy skaracić abjom pastaŭki hazu ŭ Biełaruś praparcyjanalna zapazyčanaści pierad «Hazpromam», — zajaviŭ Miler na sustrečy ź Miadźviedzievym.
«Z ulikam taho, što my ź Biełaruśsiu ŭzajemadziejničajem u partniorskim klučy, dadzim piacidzionny termin dla našych kaleh dla taho, kab jany vyznačylisia, jak pavodzić siabie dalej. Vy vyjdziecie na kiraŭnikoŭ adpaviednych biełaruskich struktur, jakija hetym pytańniem zajmajucca, i prapanujecie im u samyja karotkija terminy pahasić zapazyčanaść», — daručyŭ Miadźviedzieŭ Mileru.
«Kali hetaha zroblena nie budzie, tady daviadziecca prymianiać inšyja miery», — skazaŭ prezident.
Miadźviedzieŭ adznačyŭ, što pytańnie likvidacyi zapazyčanaści biełaruskaha boku pierad «Hazpromam» jon abmiarkoŭvaŭ na niadaŭniaj sustrečy z Alaksandram Łukašenkam. Rasijski prezident adznačyŭ, što zapazyčanaść pierad «Hazpromam» pa raźlikach za haz sioleta składaje prykładna 200 młn. dołaraŭ.
Pavodle słoŭ Alaksieja Milera, Biełaruś u adnabakovym paradku praciahvaje płacić za haz pa canie 2009 hoda. «Hazprom» nakiravaŭ u Minsk dva aficyjnyja listy. «My nie atrymali adkaz pa sutnaści, kali budzie pahašana zapazyčanaść», — skazaŭ Miler.
«
Ja razmaŭlaŭ z Alaksandram Ryhoravičam, jon skazaŭ, što heta [situacyja z zapazyčanaściu] vyznačajecca ciažkim finansavym stanoviščam,ale, kali ščyra, zaraz usim ciažka, i ŭ «Hazproma» šmat prablem. Tamu, na žal, heta niedastatkovaje tłumačeńnie», — zajaviŭ Miadźviedzieŭ.
Jak ličyć kiraŭnik «Hazproma», u Biełarusi jość srodki dla vypłaty doŭhu. Miler paviedamiŭ, što abjom nabytych akcyj «Biełtranshaza» na 2,5 młrd. dołaraŭ byŭ nakiravany «na kampiensacyju pavyšeńnia cany na haz».
«Hazprom» sioleta poŭnaściu apłaciŭ 50-pracentnuju dolu «Biełtranshaza», i sioleta byŭ apłačany apošni tranš u pamiery 12,5% na sumu 625 młn. dołaraŭ», — skazaŭ Miler.
11 červienia ŭ Maskvie Łukašenka pravioŭ sustrečy ź Miadźviedzievym i staršynioj urada Rasii Uładzimiram Pucinym. Pra vyniki pieramoŭ ničoha nie paviedamlałasia.